Shah kem 6 ki kynthei, 1 shynrang, ba ia pyni bor ha Civil Shillong,

31 Jymmang:
Hynriew ngut ki kynthei bad uwei u shyn rang ki la shah kem hynnin ka sngi ha ki Pulit namar ba ki la ialeh pyrshah ban rung hapoh ka jaka ba shah thngan u CEM barim ka KHADC u bah Adelbert Nongrum ha u Mot u Kiang Nangbah hajan Civil Hospital, Shillong.
Kane ka jingshah ka jingjia ka la jia ha ka por 5 baje janmiet hadien ba la wai ka rally jong ka Hynniewtrep Youth Council (HYC) ba long ha madan Laban namar ba ki thmu ban leit sha ka jaka ba don u bah Nongrum watla ki pulit kim shah namar la pynjari 144 CrPC, la kam u SP ka East Khasi Hills u bah M Kharkrang.
Ki kynthei kiba shah kem ki long ka kong Banisha Nongsiej 21 snem na  Mawlai, Umiajur Block-III, ka kong Barisha L. Mawphlang 38  snem na Lumshyiap Golflink, Shillong, ka kong Caroline Nongrum 37 snem na Mawlai Mawiong, Shillong, ka kong Banisha L. Nongrang 38  snem na Mawlai, Nongpdeng, ka kong  Aisuk Dirborn 35 snem na Nongrah, Rynjah, Shillong, ka kong Kerdalin Biam 33  snem na Mawlai Mawiong, Shillong bad u bah Ialam Shympliang 32  snem na Upper Shillong Lumpdeng.
Napdeng kitei ki ba shah kem saw ngut ki dang don ha Civil Hospital bad lai ngut la shah rah sha iing Kashari bad kin don 12 sngi ha ka judicial custody.
Ki pulit ki kynnoh ba la kem ia ki namar ba ki pynsaphriang ia ki jingtip lyngba ki social media ban pynthut ia ka shongsuk shongsain.
Katkum ka jingong u SP, kitei ki paidbah hadien ba la wai ka jingialang ki la thmu ban iaid jubor sha ka jaka shah thngan bad ki pulit ki la khanglad ia ki hynrei namar ba ki ia pyneh ki pulir ki la hap ban pyndonkam da ki lathi haduh ba bun ki la mynsaw na kane ka jingshah kawut lathi ha ki pulit.
Ka daw ba ki kynthei ki mynsaw na u ka dei namar ba ki dkhot nongialam shynrang ka HYC ki la pyndonkam da ki kynthei, la kynnoh u SP.