Shah kem uba buh bom ha ophis NPP, pyndem u dkhot HNLC ha Khliehriat

Shillong: U myntri kam pohing jong ka sorkar jylla u bah Lahkmen Rymbui ha ka sngi palei u la iathuh ba mynta ka mynstep uwei u dkhot jong ka sengkiengatiar Hynniewtrep National Liberation Council (HNLC) u ba tip kyrteng kum u Emanuel Suchen u la wan pyndem wait ialade hakhmat ka pulit ha Khliehriat.

U Emanuel Suchen u la pyniasoh ia la de bad ka sengkiengatiar HNLC ha u snem 2002 hynrei ha u snem 2008 u la shah kem noh bad la pyngngat ha ka kyndon MPDA ha ka ba u la shah set along ha duh 3 snem hadien ba u la lait na along u la leit phai biang sha ka Sengkiengatiar bad mynta ka sngi u la wan pyndep wait noh ia lade .

U bah Rymbui u la iathuh ba ha ka jingtohkit jong ki ulit la lap ba u Emanuel u dei u ba don kti ha kajingpynbthei ha ka StarCement ka ba la jia ha ka 14 tarik u Nohprah 2020 , bad ha ka jaka sah jong ki pulit ha Khliehriat ka ba la jia ha ka 14 tarik u Naitung 2021, ha kaba ia dei bad kane ka jingtohkit ka dang iaid shakhmat.

Ha kaba ia dei bad ka jing buh ia u bomb IED ha khyrdop ka ophis jong ka National People Party ha ka 4 tarik mynta u bnai, ki pulit hynnin ka sngi ha ka por kumba 3:30 baje eiei ki la rah ia u wei u briew u ba tip kyrteng kum u bah ksankupar Kharkongor u ba shong ba sah ha Umphyrnai. U bah Rymbui u la iathuh ba ki na u bah Ksankupar la ioh ban kurup ia ki ar tylli ki mobile phone bad katto katne ki kot ki sla ki ba donkam bad ka jingtohkit ka dang iaid shakhmat ban ioh ban kem sa ia kiwei ki ba donkti ban ia rap ia u. U bah Lahkmen u la ong ruh ba ka jingleit ban kem jong ki pulit ia u Ksankupar ka long hadien ba ki la ioh ia ki sabut sakhi ki ba biang kiba la pynpaw ba u donkti ban buh ia u bomb ha ka ne ka jaka ha ka ba ia dei bad ka ne ki pulit ki dang pynlong shuh shuh ia ka jingtohkit.

U bah Lahkmen u la iathuh ruh ba ha ka ba ia dei bad ka jingpynbthei ha ka jaka sah jong ki pulit ha Khliehriat kaba la jia ha ka 14 tarik u Naitung 2021 haduh mynta ki pulit ki la ioh ban kem ia ki 4 ngut ki briew ki ba don kti bad u bah Emanuel u ba la wan ban pyndep wait hi hakhmat ki pulit. Katba ha ka ba ia dei bad ka jing pynbthei IED ha iew Laitumkhrah kaba la jia ha ka 10 tarik u Nailar 2021 ki pulit ki la ioh ban kem ia ki 4 ngut.