Mynsaw bun ngut ha ka jingjia aksiden hapdeng ka Sumo bad Baleno ha Jyntru

Nongpoh: Ki la don kumba 14 ngut ki briew kaba kynthup ia ki khynnah bad kiba shong ha kawei ka Sumo kaba don ia number ML-06-5669, ki la mynsaw bad kata ka la jia hadien ba katei ka Sumo ka la shah tynrah ha kawei pat ka Maruti Baleno kaba don ia u number ML-10B-9539 kaba wan na kawei pat ka liang pyrshah.

Ha katei ka jingjia aksiden kaba la jia hapoh ka surokbah NH-6 bad kaba hap hapoh ka shnong Jyntru, ki la don 3 ngit kiba mynsaw jur eh ha katei ka jingjia bad kita ki dei kiba shong hakhmat jong katei ka Sumo, kaba kynthup ia u nongniah ka Sumo bad kumjuh ruh u nongniah jong ka Maruti Baleno.

Ka tyllong khubor kaba la iohlum, la ong ba katei ka Sumo ka dei kaba mih na ki thain Nongthliew, East Khasi Hills District bad kaba thmu ban leit sha ki thain Nongpoh, hynrei haba la poi ha Jyntru, ki la mad ia katei ka jingjia ba sngewsih, kata ka long hadien ba ki la shah tynrah ha katei ka kali Baleno ba la pynher stet bad kaba la ryngkang na shiliang sha shiliang ka surok surokbah NH-6 bad kumta hi ka la leit tynrah beit nakhmat jong katei ka Sumo bad kaba la wanrah ia ka jingmynsaw ia ki briew kiba shong ha katei ka Sumo.

Kat haduh ba la thoh ia kane ka khubor, la ong ba ym pat don mano mano kiba la khlad ha katei ka jingjia, hynrei ki la don pat kiba la mynsaw jur eh, khamtam ia u nongniah ka Sumo lem bad ia kiwei kiba shong hakhmat katei ka Sumo. Ki Pulit ka Nongpoh Police Station tang mar ia tip halor katei ka jingjia ki la leit mar mar sha katei ka jaka, na bynta ban leit ai jingiarap ia kito kiba la mynsaw bad ia kaba la pynkit noh mar mar sha ki jaka sumar.