Wan sha ka Dorbar Bah da ka burom ka akor, ong ka SKRS

Shillong, 27 Jymmang:
Ka Joint Action Committee ka Synjuk Ki Rangbah Shnong (Sor bad khap sor) ka la kyrpad ia ki paidbah ka bri u Hynniew Trep ba kin wan sha ka Dorbah Bah u Hynniewtrep da ka burom ka akor da ka kaba jai jai bad ryntih bad da ka burom ka akor.
Ha ka jingpynlait kyrwoh, u general secretary ka Synjuk Bah RL Blah u la ong ba ka JAC ka kyntu ia ki paidbah ba kin ia mih paidbah ban wan sha ka Dorbar Bah kaba la buh ban long ha ka 30 tarik Jymmang 2015 por 11 baje mynstep ha madan Polo khnang ba kan long kaba jop. “Kane ka long ka jingkyrpad bad ka jingkyntu na ka liang ka Joint Action Commtee (JAC) ka Synjuk Ki Rangbah Shnong (sor bad khap sor) sha u paidbah ka bri u hynniewtrep kiban wan shim bynta ha ka dorbar bah ka bri u hynniewtrep ban long ha ka 30 tarik Jymmang, 2015 ha madan polo ha ka por 11 baje mynstep, ban mih paidbah ryntih bad da kaba jai jai wat hadien ba la wai ka dorbar ruh. Bad ba ngi dei ban kynmaw ban bat la ka burom ka akor, ha ka iaid ka ieng ka ktien ka thylliej, ban ri burom ia la ka jait ka kynja ban pyni ha sla pyrthei ba ngi long ka jaidbynriew kaba tip briew tip blei”, la ong u Bah Blah.
Ha kawei ka liang u la kyrpad ruh ia baroh u Khynriam u Bhoi, u War, u Pnar, ba kin iawan poi sha katei ka dorbar bad ban long tylli baroh hapoh kawei ka lympung nangne shakhmat ha kaba iadei bad ka iap ka im jong ka jaitbynriew.
30 tarik khang shnong ka Laitumkhrah
Ka Executive committee jong ka Laitumkhrah Dorbar Shnong Pyllun kaba la ia kynduh kyrkieh shen ka la rai ban ai jingkyrshan bad ban shim bynta ha ka Dorbar bah ka bri u hynniewtrep ba la khot da ka JAC ka Synjuk ki Rangbah Shnong (sor bad khap sor) ha madan polo ha ka 30 tarik Jymmang 2015.
Ka kyrwoh khubor na u Rangbah Shnong u bah SB Nongdhar ka la pynbnaba yn khang shnong ha katei ka sngi ban ailad ia ki paidbah ba kin ia mih ryntih sha katei ka jingialang La kyntu ia ki nongshong shnong na ki dong bapher bapher jong ka Laitumhrah ban ia mih paidbah, bad ka jingiakynduh lang jong ki kan long ha Laitumkhrah Police Point ha ka por 9.30 mynstep nangta kan sa bud saka jingiaiaidlang ba jar jar sha madan polo.