Ujor ha u myntri, bym ïoh lut ka bai shna ïing hapoh ka PMAY

Shillong:U Prof. S.P. Singh Baghel, u Myntri khynnah ka Sorkar Pdeng uba peit ïa ka tnat Law & Justice, ha ka 30tarik Nailur 2021 u la leit jngoh bad ïasyllok bad ki nongshong shnong bad katto katne ki jaka pdeng ba pyntreikam ïa ki skhim kiba dei ïoh myntoi ne kiba dei ïoh ki skhim Sorkar Pdeng kiba kynthup ïa ki Corona Vaccination Centre, Health Insurance, bad kiwei kiwei, bad ban shem kumno ki nongshong shnong ki ïoh jingmyntoi na ki skhim.

Ïa u la synran lang da ki ophisar na ki tnat badei peit, ki agency kiba pyntreikam ïa ki skhim Sorkar Pdeng. Utei u Myntri u la sngap ruh ïa ki jingeh ne jingai jingmut na kiba ïoh jingmyntoi jong kiba bun ki skhim bad kumjuh ruh na kito kiba pyntrei ïa ki.

Ki jaka ba u Myntri u la leit jngoh ki long ka Health Dispensary ha Rynjah, Shillong ban tip halor ki Covid vaccination center bad kiba ïoh myntoi na ka Ayushman Bharat PM-JAY. La ong ba kam shym la don ka jingujor na ki nongpang kiba la wan shim dawai bad phah sumar.

Utei u Myntri u la leit jngoh ruh ïa iwei na ki nongïoh myntoi hapoh ka MHIS (State Scheme), ha R & R Colony (Rynjah, Shillong) bad u la ïoh ruh ban ïasyllok halor katei ka skhim. Ka la don ruh ka jingleit jngoh ïa ki ïing ki nong ïoh myntoi jong ka MHIS (State Scheme).

U la leit ruh ban jngoh ïa ki nongïoh myntoi jong ka Swach Bharat Mission ha Umpling, Shillong.
U la leit jngoh ruh ïa ki nongshong shnong kiba ïoh myntoi hapoh ka Pradhan Mantri Ujjawala Scheme(PMUY) ha Nongmensong, Shillong.
U la leit ruh ban ïasyllok ha kawei ka ïing hapoh Umpling, kaba dei kawei na ki longïing ba ïoh myntoi hapoh ka Prime Minister AwasYojana (PMAY) Urban Meghalaya.

Hapdeng ka jingïasyllok bad utei u Myntri katei ka longkmie ka la pynpaw ka jingsngewkhia shaphang katei ka skhim namar ka dang ïoh pdiang ka pisa tang T. 60,000.00 na ka T. 1,50,000.00.
Ka la pynpaw ruh ka jingkmen ban shah kynthup hapoh katei ka skhim PMAY bad kyrmen ruh ba kan sa ïohpdiang lut ïa ka pisa ba dangsah. La ong ba baroh ka jinglut ban tei ïa ka Ïing jong ka, ka long T. 7.00 lak.
Utei u Myntri u la leit jngoh ruh ïa ka Waste Recovery Center ba la tei da ka Shillong Municipal Board hapoh ka Swachh Bharat Mission bad ïasyllok bad kiba dei ïoh myntoi na katei ka projek kaba dei ruh kaba la pyntrei da ki samla ka shnong kiba lum bad kit ñiut.
Utei u Myntri u la ïasyllok ruh bad ki samla pule ka Martin Luther Christian University bad Indian Institute of Public Service kiba don ka jingïatreilang bad ka SMB hapoh ka jaka pynlang ñiut ne Waste processing centre, ong ka kyrwoh ba la phah da u Bah W. Khyllep, Commissioner & Secretary Govt. of Meghalaya, Law Department.