Bym biang ki doctor, ki nos ha PHC Mawsynram; ujor sha u myntri

Shillong:U Myntri ka Tnat Health & Family Welfare, u James P. K. Sangma u la leit ban jurip ia bun tylli ki jaka sumar ha ka thaiñ Mawsynram, ha ka Sngi Palei, kata ha ka 30 tarik u Nailur, 2021. Ka jingthmu jong kane ka jingleit ka long ban peitthuh ia ki jingdonkam bad jingpynbha ba ka Tnat ka dei ban shimkhia.

Ha kane ka jingleit jong u, la synran da u Bah Alvin Sawkmie uba long u MDC ka Mawsynram Konstitwensi lem bad u President ka NPP Mawsynram Block bad kiwei pat ki dkhot ka National People’s Party na kane hi ka Block.

U James Sangma u la ong, “Ka koit ka khiah ka long kaei kaei kaba donkam eh ha kaba iadei bad ka jingbha ha ka imlang sahlang. Kane ka long ka jingsneng ba ka pyrthei ka la mad bad shem shitom khamtam ha ka por ka khlam COVID-19.”
La pyntip ruh ia u James Sangma ia ka jingbymbiang ki doctor, nos, heh ophisar bad ki kiwei de ki jingdonkam ba kyrkieh ha ka PHC ha Mawsynram. Ynda haba u Myntri u la iohsngew ia kine ki jingeh baroh, u la kular ia ki nongshong shnong bad kumjuh ruh ia ki nongtrei ka Tnat ba un sa shimkhia ia kane ka ishu ban wanrah ki jingkylla bad jingbha ha ka por ba biang.

Ha kane ka jingleit jurip, u Myntri badonburom u la iakynduh bad bun ki nongkitkam ka NPP-Shnat Sawsymper ki ba la ai ka ‘memorandum’ ban kyntiew ia ka Sawsymper sub-centre sha ka Primary Health Centre (PHC). Ki dkhot ka NPP-Shnat Dangar ruh ki la ai ka ‘memorandum’ ban pynbha ia ka Dangar PHC bad ha ka juh ka por ban kyntiew ia kane ka PHC sha ka Commuinty Health Centre (CHC).

U James u la bynrap, “Nga la ioh ki jingkyrpad na ka nongkitkam NPP jong ka Shnat Sawsymper bad ka Shnat Dangar ban kyntiew ia kine ki jaka sumar khnang ban lah ban ai jingsumar ka ba kham bha ia ki paidbah. Ki jingkyrpad ki long kiba sngewdei shisha bad na ka liang ka Tnat, ngin ialeh ban wanrah ia kita ki jingkylla ba donkam ha ka por ba biang”.
Ha ka juh ka sngi, u Myntri u la leit ruh ban jurip ia ka Lawbah PHC ban khmih ba ki jingtrei ki iaid beit iaid ryntih. U Myntri u la pynpaw ia ka jinghun ka rukom pyntrei kane ka PHC bad u la kular ba yn pyntreikam noh ia ka mar ia dep khnang ba yn lah ban pynbiang ia ka jingdonkam ki paidbah kane ka thaiñ.

Khatduh iawai, U James Sangma u la leit sa sha Ryngku PHC bad iakynduh ia ki nongtrei bad ban sngap ia ki jingeh ba ki ia kynduh na ki por sha ki por bad u la kular ba ka Tnat kan ialeh kat ba lah ban weng ia kita ki jyrwit jyrwait kiba pynthut ia ka rukom treikam kane ka jaka ai jingsumar.
U Myntri u la pyntikna ba ka Sorkar Jylla kan trei met ban mynsiem ba kan rat diengkhong ia ki jingjynjar bad jingshitom ki paidbah ha kaba iadei bad ka koit ka khiah bad kan ialeh kat ba lah ba baroh ki nongshong shnong ka Jylla kin ioh ia ka jingsumar ba paka.