Ka ain MRSSA, ba komik

B.M.Lanong

U Dr. Mukul Sangma bad ka sorkar 5 snem jong u (2013-2018) haba u dang long Chief Minister, ula wanrah ia katei ka ain kaba sngew thamula bha na baroh kiwei ki ain, namar na ka ILP, kaba kwah ma u hi, u thaw dur noh sha ka MRLVT-2013, na kane pat u thaw dur shuh sa sha katei ka MRSSA 2016, tip kaba u mut kumno, to ngin peit harum.

Shuwa ban poi shata, don ruh ki Seng Bhalang kiba dawa ba dei ban pyntrei kam noh ia kane ka ain MRSSA, u Dr. Mukul ruh u dawa ha kine ki sngi ban pyntreikam noh ia ka, tip balei um shym sdang hi ha utei u snem 2016, ne ha u 2017-18, namar u Lat ula dep mynjur (assent) naduh u snem 2016 hi.

Tiak Ban Shu Kynmaw
U Dr.Mukul, uba long Chief Minister naduh April 2010 ter-ter-ter haduh February 2018, ula hukum ban thaw ia ka ILP da ka hukum (Notification) jong u ha u September 2012. Ka Committee kaba u thung hi ma u, ka la pyndep ia ka kam, ban pyntreikam noh ia ka ILP.

Ha u snem 2013 ynda ula jop bad long Chief Minister biang, u shong man-man kum bym tip ei-ei, u wanrah pynban da ka ain MRLVT 2013, (Meghalaya Regulation of Landlords and Verification of Tenants Act 2013), ka ain kaba iadei halor ki trai ing bad ki nongshongwai.
Kane ruh ka sah ha ophis jong u, khlem poi shaei-shaei.

Ha u snem 2016 u wanrah pat ia katei ka Meghalaya Residents Safety and Security Act (MRSSA), ba la mynjur biang u Lat ha u 2016 hi. (Ka ain shongsuk-shongshngain ki nongshong shnong). Ia kane ruh u khlem pyntreikam haba u don hi haduh u snem 2018.
Jingmut Kane Ka Ain MRSSA
Hana ban pynthikna bha, kiei ki nongshongwai ing bad ban pyllait ia ki paidbah na ki kti ki riew sniew ba kin rung hapoh jylla, khnang ban don ka jingsuk jingshngain bad kum kine ki rukom pynbiang, da ki tnat treikam District Task Force, dei ka jingmut kane ka ain.

Haduh mynta ruh ym pat sdang ban pyntrei ia kane ka ain u Dr.Mukul, namar ma u uba long u nongthaw ruh um shym leh kumta, namar khlem kane ka ain ruh, ki don bun kiwei ki ain iada kiba la don lypa hapoh ka jylla, nalor ki ain kiba don ha IPC (Indian Penal Code).
Kum u ’riew ain, ngam peiphang ia kane ka ain u Dr. Mukul, namar nalor ba ula tep eit miaw ia ka ILP kaba ula pun hi, mynta pat u thaw dur bula da kane ka Ain MRSSA kabym don jingmut ei-ei, hynrei kaba komik thamula. Peit ia kane ka parakrap 12 harum-
(An Offence under this Act shall be non-Cognizable and bailable).

Kano-kano ka jingpynkhein ia kane ka Ain, kam don jingteh ei-ei bad kabym shah set patok. Lada kane kam dei ka kam komik, ka dei kaei?
Niuma ki don ki kam sniew barit-baria (simple Offences) kiba ioh jamin. Hynrei kat ia kane ka ain, ban khang na kamon, pyllait suk na kadiang, don jingmut aiu?
Haba kumtei, don jingmut hi ia ka ain kaba kum kane? Kito kiba phah pyntreikam noh ia kane ka ain, kynthup ruh ia u Dr.Mukul hi, uba dawa kumta ha kine ki sngi, ki sngewthuh kumno ia kane ka ain MRSSA?

Ki paidbah ta ki ieng beit halor ka ILP. Kaei ka jubab u Dr.Mukul halor kane bad balei u tep im ia ka jingai jingmut ka Committee 2012 jong u hi, kaba “kwah ILP tang shisur?”