Byrngem shah thngan ka Wapungskur

Shillong, 26 Jymmang:
Ka Dorbar Shnong jong ka shnong Wapung skur , Jaintia Hills District ka la mih shakhmat ban kyrshan ia ka jingshah thngan u bah Adelbert Nongrum, CEM barim ka KHADC bad kiwei pat kiba la leit snohkti lang bad ka la byrngem ba kan sa ia snohkti lang sha katei ka jingshah thngan lada ka sorkar kam mynjur ia ka Village Administration bill. Haba kren sha ki nongthohkhubor mynta ka sngi ha Shillong Press Club, u Rangbah shnong ka Wapungskur u bah Salty Ryngkhlem u la ong “ Ngin kyrshan ia u bah Adelbert Nongrum bad lada ka sorkar ka dang pynslem ban mynjur ia ka VAB ngin leit ban shong shah thngan lang”. “Ngi kyrpad ia baroh ki paidbah na East bad West Jaintia Hills ba kin mih shakhmat ban kyrshan bad ban ia shim bynta ha ka Dorbar bah jong ka bri u Hynniewtrep ka ban long ha ka 30 tarik u jymmang ha madan Polo” ong biang u bah Ryngkhlem uba la ong ruh ba kam pher watla u kyrshan ia ka KHADC, hynrei hadien ba la lah ban pyntreikam ha KHADC ha JHADC ruh kan sa longkam.U la ong ruh ba da lei lei um lah ban pdiang ia ka Ordinance ka sorkar.
Ha kajuh ka por, utei u Rangbah Shnong ka Wapungskur u la ong ba ka dorbar Shnong ka kyrshan ia ki bahaing hasem jong ki ar ngut kiba la shah siat iap ha ka por ia khih dewiong ki bahaing jong u Derest Siangshai bad ka kong Setmon Phawa na ka shnong Wapungskur kiba la shah siat iap ha ka 24 tarik u nailur, 2014 ha ka Mookhep hadu ba kin da ioh ia ka jingdawa jong ki na ka sorkar.
U la pynkynmaw ba ha ka por ba la jia katei ka jingjia, ka Dorbar shnong ka la phah ia ki mat jingdawa sha ka myntri kam pohing bad ka la kular ban kan leh eiei sha ki bahaing hynrei haduh kine ki sngi ym shym la leh eiei. U RS u la pynkynmaw ia ka myntri kam pohing ba kan pyndep ia ki kular jong ka .Katkum ka jingiathuh jong u –u la ong ba ka kong Roshan ka la kular ban iarap ban phah leit skul ia ki 7 ngut ki khun ka kong Setmon Phawa hynrei haduh mynta ym shym la leh eiei.