U DHANIA

Kong Linda Kongwang

U DHANIA (CORIANDER): Ki jingmyntoi ba phylla jong une u sla jingthung iaka koit ka khiah.

U coriander ne cilantro uba ju khot ruh u Chinese Parsley bad udei uba la jutip bha ruh kum u ‘dhania’ ha ri India. Une u sla kynbat jingthung udei uba mih naki symbai coriander bad la ju pyndonkam ha satlak ka pyrthei naka bynta ban pynsma bang iaki jingtah. Une u jait sla jingthung lah ban ioh baroh shisnem bad u balah ruh ban pyndonkam bha naka bynta ban pynsma bang iaki kamra khamtam ka kamra iing shetja.

U coriander uba la jutip kum u dhania ha ri India hynrei u dei uba mih tynrai ha ki jaka naduh South Europe, North Africa bad haduh ha South Asia. Udei ruh uba la jutip bha kum uwei napdeng kiba bun ki jingthung kiba ju rep bha haki jaka Hanging Garden of Babylon bad udei u jait jingthung uba jem bad u bymlah ban san palat iaka 50 cm.

Ia u symbai jong u coriander la ju pyndonkam kum ki jingber bapher bapher haki jyntah bad kiba lah ban bam ia u suda. Une u kynbat jingthung u don iaki nutrients ki bapher bapher kum ka Vitamin A, Vitamin C bad Vitamin K. U dhania ymtang ba u lah ban pynsma bang iaki jingtah hynrei udei ruh uba ai shibun ki jingmyntoi haka liang ka koit ka khiah jongu briew. Nalor ba u long u jingber uba la bna nam bha halor ka jinglah ban pynsma bang, u coriander ne dhania udei ruh uba la jutip kum u dawai kynbat uba lah ban iarap pynkoit na shibun ki jait jingpang jingshitom.
Harum phin sakhi katto katne ki jingmyntoi kiba phylla kiba phi ioh haba bam ia u dhania.

IARAP BAN TEHLAKAM IAKA BLOOD PRESSURE:— Katkum ka jingwadbniah daka Journal of Ethnopharmacology, ban bam ia u coriander ne dhania kalah ban iarap pynduna iaka jingkiew ka blood pressure. Ka jingjur ka jingtreikam jongka Calcium ions bad acetylcholine kaba don ha u dhania kalah ban tehlakam iaki jingbanbor haki thiedsnam bad kane ka iarap bha ban pynkoit iaki jingthait jingkhuslai ha ki briew kiba ioh iaka jingshitom hypertension. Kumta ka pynduna iaka lad ban ioh iaka jingpang klongsnam kynthup iaka heart attack bad stroke.

IARAP BAN SUMAR IAKA JINGPANG DIARRHOEA:— Ki essential oils kiba don ha u coriander ne dhania kiba kynthup iaki component kum ka Borneol bad Linalool, ki iarap naka bynta ka digestion, ka jingtreikam bha jongu Liver bad ka jingleit khyndew. Katkum ka jingpule bala pynmih haka Ethnopharmacology Leaflets, u coriander ne dhania, kilah ban iarap pynduna ka jingma jongka jingpang pynhiar kpoh. Kine ki sla kynbat kidei ruh kiba la jutip bha kum ki lad jingsumar hi ha iing naka bynta ban iada naka jingpang jingkynroi prie, prie bad suhkpoh.

IARAP BAN SUMAR IAKA JINGPANG HAKA SNIEHDOH:— Naka daw ka jinglong disinfectant, antiseptic, antifungal bad antioxidants jong u dhania kalah ban dei ka nuksa kaba bha tam ban tehlakam iaki jingpang haka sniehdoh kynthup iaka jingtyrkhong jongka sniehdoh, ki khaid kiba long saw bad dait bad ruh ka jingmih khniang. Da kaba bam ia u coriander ne dhania kalah ban pynkoit ia kine ki jingshitom haka sniehdoh jongphi.

IARAP NAKA BYNTA KA JINGPANG ULCER HAKA SHYNTUR:— Ka citronellol kadei ka bynta kaba kongsan kaba pynlong antiseptic. Ki essential oils kiba don ha u dhania la jutip ba ki don iaka bor ban sumar iaki jingmong kiba thang bad tyrha hapoh ka shyntur jongphi. Katkum ka jingwadbniah une u sla kynbat udon ruh iaka jinglong antibacterial, analgesic bad anti-inflammatory properties kaba iarap ban pynkoit naki jingmong haka shyntur. Bam is u dhania arsien ne laisien haka shisngi kalah ban iarap weng shisyndon ia kine ki jingshitom.

IARAP IAKA DIGESTION:— Naka daw ka jingdon kyrhai ki essential oils ha u dhania, kalah ban iarap halor ka jingmih bha jong ki enzymes bad digestive juice haka kpoh, kumta ka pynkhlain iaka digestion. Ka jingpule ka pynshisha ruh ba kito ki khynnah kiba don jingshitom haka kpoh kilah ban kynthuplang ia u dhania haki jingbam ba man ka sngi jongki naka bynta ban iarap halor ka jingshem jingeh haka kpoh.

IARAP KYNTIEW IAKA KOIT KA KHIAH JONG KI SHYIENG:— Kum ka tynrai ba riewspah jongka Calcium, u coriander ne dhania kidei kiba ai jingmyntoi kiba biang bha naka bynta kito ki briew kiba kwah ban iada bad sumar iaki shyieng jongki. Ka Calcium lem bad shibun ki minerals kiba kongsan kiba shem ha u dhania kidei kiba lah ban iarap pynsan biang iaki shyieng bad kyntiew iaka jingshan jongki bad ruh ialeh pyrshah iaki jingpang shyieng (Osteoporosis). Ka jingkynthuplang wat tang khyndiat u dhania haki jingbam ba manka sngi jongphi kalah ban iarap kyntiew iaka koit ka khiah jongki shyieng bad ban ioh ki shyieng kiba khlain naka bynta ki snem ban dangsah.

IARAP BAN SUMAR IAKI KHMAT:— Ki coriander ne dhania kidei kiba dap shibun daka jingdon ki antioxidants, minerals, Vitamin A bad Vitamin C bad dei baroh nakane ka daw ki lah ban ai shibun ki jingmyntoi naka bynta ban iada naka jingshahktah, jingthait jingshon bad ka jingbanbor haki khmat. Daka jingdon ka Beta-Carotene haki sla dhania, kalah ban iarap ai jingiada na kiwei pat ki jingpang jingshitom kiba lah ban ktah iaka khmat bad iarap ruh ha kaba iadei bad ka jingiohi bha ki khmat.

IARAP SUMAR IAKA ANAEMIA:— Ki coriander ne dhania ymtang ba kidon iaki antioxidants, Vitamin ne minerals hynrei kidei ruh kiba riewspah halor ka jingdon ka iron haki, kaba lah ban iarap ia kito ki briew kiba don iaka jingshitom ha kaba ring bad pynhiar mynsiem bad thait kloi. Da kaba dih iaka um dhania man la ka step ka lah ban pynduh shisyndon iakine ki jingeh.

IARAP BAN TEHLAKAM IAKA JINGPANG DIABETES:— Katkum ka jingpule bala pynmih haka Journal Of Food Chemistry, naka daw ka jingtreikam bha jongka um dhania haki endocrine glands, ka jingpynmih iaka insulin ka kham jur naki pancreas kaba lah ban nangkyntiew shuh shuh iaka ka insulin haka snam. Kane kalah ban iaid beit ha kaba pyniadei bad kjit khambha iaka shini naka snam. Une u sla kynbat udei uba ai jingmyntoi shibun naka bynta kito ki briew kiba don iaka jingpang shini bad kiwei ki jingshitom kiba iadei bad ka jingpang shini (diabetes).

Khublei.