Pynjur pahara ki pulit, namar ka pakhang shnong

Shillong,
26 Jymmang:  
Ki pulit ki la pynjur ia ka jingpahara namar ka jingkhot pakhang shnong ba 24 kynta ka HNLC lashai ka sngi ha Khasi bad ha Jaintia Hills. Na ka liang ki pulit ki la long kiba la khreh ban iada ia kano kano ha kane ka kynta pakhang shnong ban pynthikna ba ka iaid ka ieng bad ka suk ka sain kan iaid beit. Haduh ba la thoh ia kane ka khubor, kam don kano kano ka jingjia ha kano kano ka bynta jong ka Khasi bad Jaintia Hills wat hadien ba la sdang ka pakhang shnong naduh ka por 6 baje janmiet ha kane ka sngi Hatmajai.
Ki paidbah nongiew nonghat la iohi ba ki la mareh bad iabeh ban leit phai kloi sha la iing namar ka jingsma ia ka pakhang shnong ha kylleng ki jaka jong ka nongbah Shillong.
Ki bor synshar district jong ka ri Khasi bad Jaintia Hills ki la pynlong ia ka jingpynkhreh kaba biang ban iada ia ki paidbah na kano kano ka jingjia bad ki la pynjari da ka kyndon 144 CrPC kaba mana ban iaid palat palat ia ka san ngut.
Nalor ki pulit ka jylla, ka sorkar ka la buh pahara ruh da ki CRPF ha kiba bun ki jaka ha ka nongbah.
Ka pakhang shnong ka HNLC kan kut lashai ka janmiet ka sngi Balang.