Ki jaka jngohkai ha Meghalaya, ki shim ia ka dor kaba tad eh, ong u ophisar

Nongpoh:Ha ka sngi kaba ka Ri-Bhoi Tourism & Environmental Development Forum (RBTEDF), ka la pynlong ia ka prokram ha Marngar Lake, kata kum shibynta ban iasnohktilang ha ka ban rakhe ia ka World Tourism Day 2021, u Bah B. Nongkynrih District Tourism Officer (DTO) ka Ri-Bhoi District, u la ong ba ka sorkar jylla lyngba ka tnat ki kam jngohkai pyrthei ka don ia ka jingangnud kaba khraw eh ban nang kyntiew shuh shuh ia ki kam jngohkai pyrthei kiba don ha ki jaka bapher bapher hapoh ka jylla.

Utei u heh ophisar uba dei peit ia ki kam jngohkai pyrthei ha Ri Bhoi, u la pynpaw ruh ba ki jaka jngohkai pyrthei kiba don hapoh ka jylla, ki dei kiba shim ia ka dor kaba tad eh, haba ianujor bad kiwei ki jaka jngohkai pyrthei kiba don ha kiwei ki jylla jong ka ri.

Shuh shuh, u la ong ruh ba ki jaka jngohkai pyrthei kiba don ha Meghalaya, ki dei shisha kita kiba khring ia ki nongwan jngohkai pyrthei na ki briew na shabar jylla bad ia kiba na shabar ri ruh kumjuh, namarkata ka donkam eh ia ki nongpyniaid ia ki jaka jngohkai bapher bapher, ba ki dei ban nangpynbha ne ban sumar sukher, khnang ba kan nangkhring ia ki nongwan jngohkai pyrthei kiba na shabar.

Na ka jingkren utei u heh uba deipeit ia ki kam jngohkai pyrthei ha Ri Bhoi, u la kyntu ia ki nongpyniaid ha ki jaka jngohkai pyrthei ba ki dei sumar bha ia ki jaka jngohkai bad nalorkata, u la ai jingmut ruh ia ki ba ki dei ban pynkiew noh ia ka bai rung sha ki jaka jngohkai pyrthei, namar lada ianujor hi ki jaka jngohkai pyrthei ha ka jylla, ki pher bak-ly-bak haba ianujor bad ki jaka jngohkai ha kiwei ki jaka, kaba ki ju shim ia ka dor kaba heh, kata khlem da don ia ka sawdong sawkun kiba itynnag, namarkata ki jaka jngohkai pyrthei ha ka jylla, ki la deihok ban kyntiew ia ka bai jngohkai, khnang ba kan long ka jingmyntoi ym tang ia ki nongpyniaid, hynrei kan ai jingmyntoi ia ka sorkar ruh kumjuh.

Kiba la donlang ha katei ka sngi, ki kynthup ia u Bah Plielad Tiewsoh Chairman ka RBTEDF, Bah Marvelous Pde General Secretary, ki nongialam naka Marngar Eco Tourism & Cultural Development Society lem bad shibun kiwei de ki riew rangbah katei ka thian.

Ha ka jingkren maitphang, u Bah Plielad Tiewsoh, u la pynpaw ka jingsngewkmen kaba khraw ba kum ka Forum ryngkat ka jingiatreilang bad ka Marngar Eco Tourism Development Society, ba ki la ioh ban rakhe ia katei ka sngi, kata ha ryngkat ka jingngnud ban kyntiew ia ka kam jngohkai pyrthei ha katei ka shnong lem bad ha kiwei de ki jaka bapher bapher kiba don ha Ri Bhoi.