Mih ki nongialam Raid ban maramot, surok Bhoirymbong sha Kyrdem

Nongpoh:Ki nongialam ka Raid Madan Kyrdem ha ryngkat ka jingiatreilang ki nongi alam shnong ne 20 tylli ki shnong hapoh katei ka Raid, mynta ki la iamih paidbah, na ka bynta ban maramot ia ki bynta ba la sniew palat ka surok na Umtung ter ter shaduh Kyrdem, namar ba ka la wan wanrah jingeh palat ia ki paidbah kiba pyndonkam ia katei ka surok.

Ha katei kajuh hi ka sngi, la iohi ruh ba ki nongialam shnong ka Bhoirymbong Lumdaitkhla, ki la mih ban maramot ia ki bynta ba la sniew eh ka surok ha Bhoirymbong, namar ki la don shibun ki bynta jong ka surok ba kongsan eh ha katei ka shnong, ka la sniew palat bad kaba ki bor sorkar kim shym la maramot satia.

Halor katei ka jingiamih paidbah hapdeng ki nongialam ka Raid Madan Kyrdem lem bad ki nongkitkam ha ki shnong kiba hap hapoh katei ka Raid, na bynta ban maramot ia katei ka surok, u Bah Pholning Makdoh, Sirdar ka Raid Madan Kyrdem, u la ong ba katei ka dei ka kam kaba ki kwah ban treimon sngewbha, kata hadien ba ki la iohi ba katei ka surok ka la sniew shaba palat bad kaba la wanrah jingeh ha ka leit ka wan ki paidbah ha katei ka thain.

U la ong ruh ba ki nongkitkam ka Raid ha ryngkat ka jingiatreilang ki nongialam shnong, kim don ka jingkynthoh ne kynnoh iano iano halor ka jingsniew katei ka surok bad kaba la pynlong ia ki ba kin hap mih ban maramot hi ia ki bynta ba la sniew eh jong katei ka surok, hynrei u la kyntu pat ia ka sorkar jylla ba ka dei ban pynbha noh ia katei ka surok, khnang ba kan pynsuk ia ki paidbah kiba sah ha ki shnong bapher bapher jong katei ka thain.

Katba u Bah Amberlight Masharing, Executive Secretary ka Raid bad uba dei ruh u Working President ka RBSU, ha ryngkat u Bah Banjop Maring, President ka KSU Eastern Border Area, ki la ai ka jingkhublei kaba kyrpang eh ia ki nongkitkam ka Raid Madan Kyrdem, namar ka jingshimkhia jong ki ban maramot hi ia katei ka surok, kata na bynta ban pynsuk ia ka leit ka wan ki paidbah.

Na ka jingkren jong ki, kiba la kren kum ki nongialam Sengbhalang, ki la kyntu ia ka sorkar jylla bad khamtam eh ia ka tnat kaba peit ia ki kam surok, ba ki dei ban shimkhia mardor halor katei ka surok, kata la ka long ban maramot bha ne ban shna thymmai syndon noh ia katei ka surok, ha kaba ki la pynpaw ruh ba ka jingsniew katei ka surok, ka la ktah shikatdei eh ia ki paidbah kiba sah ha katei ka thain.