Pyrshah ki nongshnong shnong bad seng, ban buh dukan Kyiad

Nongpoh:Myn hynnin ka janmiet, ki nongialam shnong, ki seng long kmie, ki seng samla shnong bad ki sengbhalang, ki la pynlong ia kawei ka jingialang paidbah ha shnong Umryngksai, Ri Bhoi ban pynpaw ka jingpyrshah ba jur ia ki nongialam ka Raid Nongkhrah, kata hadien ba ki la pynmih ka jingmaham ia ki nongialam shnong ba kim bit ban ban leit mushlia halor ka jingai NOC ka shnong Pahammardoloi, na ka bynta ban buh dukan Kyiad ha kawei ka jaka kaba don ha Umdon bad kaba don ha khappud ka shnong Umryngksai bad Lum byrhing.

Lyngba katei ka jingialang, ki nong ai jingkren naduh ki Rangbah Shnong, ki Longkmie, ki seng samla shnong bad Sengbhalang, ki la pynrem jur ia kaei kaba la leh da ki nongialam ka Raid Nongkhrah bad shnong Pahammardoloi, ha kaba na ka sur jong katei ka jingialang, ki la pynpaw ba da lei lei kin nym ailad ba katei dukan Kyiad, kaba la thmu ban buh da u riew shimet kan urlong ha katei ka jaka kaba ki thmu ban buh.

Kitei ki nongai jingkren, ki la pynpaw ba ki jingsnew lyngoh eh ba kumno ia katei ka dukan Kyiad kaba la ai jingbit ne NOC da ka shnong Pahammardoloi, hynrei la thmu pat ban leit buh ha kawei ka jaka bad kaba jngai kumba 5 KM ei ei na katei ka jaka kaba ki thmu bad nalorkata ia ka Public Hearing ruh la leh ha shnong Pahammardoloi, hynrei ia katei ka dukan Kyiad pat, la leit buh ha ka jaka kaba ki paidbah kim kwah ban don kino kino ki dukan die Kyiad ne ki Wine Store.

Ki la don ruh kiba la pynpaw, da kaba ong ba ia katei ka dukan Kyiad, la dei ban leit buh sha shnong Pahammardoloi, ka shnong kaba ki nongialam shnong ki la mynjur ban don dukan Kyiad ha shnong bad kitei ki nongkren ki la ong ruh, ba lehse ki Longkmie longkpa hapoh katei ka shnong ki pdiang ia katei ka dukan Kyiad, khlem da pyrkhat shuh ia ka lawei ki khun samla ha shnong ha thaw.

La pynkut ia katei ka jingialang da kaba iasoi paidbah, ha kaba ki nongialam shnong ki la shim ia ka roi ba ia katei ka jingsoi paidbah kin sa phah sha ka DC bad tnat Excise, na ka bynta ban pyni ba ki paidbah ha kitei ki shnong ki pyrshah ia katei ka dukan Kyiad.