Da ka Sit in Demonstration, yn sdang ‘Ka Sur Ki Nong Mawlai’ kum ka jingsdang ban pynjur ïa ka jing ïakhih

Shillong: Ka Sur Ki Nong Mawlai, kaba la lamkhmat da ka KSU Mawlai Circle, FKJGP Mawlai Circle bad HNYF Mawlai Circle kum ban sdang noh ban pynjur ïa ka jing ïakhih pyrshah ïaka jing kuman jong ka sorkar ban sospon, ïa ki 3ngut ki Heh Pulit bar jylla kiba donkti ban siat ïap ïa u Bah Cheristerfield Thangkhiew bam kwai ha dwar u Blei ha ka step 13tarik Nailar 2021.

Kumta ban pynïoh ïa ka ka hok ïa utei u Rangbah naka liang jong kane ka Sur kan pynlong ïa ka jingshong kyllaiñ myngngor (Sit in Demonstration), hangtei ha Addittional Secretariat ha ka 20tarik Nailur 2021, ka ban sdang naduh ka por 11baje mynstep, kumta na ka liang jong ngi ka ‘Sur Ki Nong Mawlai’ ka khot ka wer ïa ki nongshong shnong jong ka Shnong Mawlai ba kin ïamih ryntih lang ha katei ka jing ïakhih bad ha kajuh ka por ka khot ka wer ruh ïa ki Dorbar Shnong,Seng Longkmie bapher bapher bad ki Seng Samla baroh kiba don ha Sor Shillong bad khapsor ruh ba kin wan ban mih shakhmat ha katei ka jingsdang jong ngi kum ki Samla ban dawa ïa ka hok bad ba kum kitei ki jingjia kin ym wan jia wan hap shuh haka pateng jong ka Jaidbynriew khamtam pyrshah ia ki khun samla kiba ju mih shakhmat ban ïakhun ïaleh ïaki mat ki jura kiba ktah matïong ïaka Jaidbynriew Hynñiewtrep hi baroh kawei.

Ka jingmih shakhmat jong ki Dorbar Shnong, Seng Longkmie Shnong bad ki Seng Samla Shnong jong ka Shnong Mawlai bad kumjuh ruh ïaki Shnong kiba don ha Shillong bad kiba ha khapsor ba kin wan ban ai mynsiem bad ban dang pynrhem ïaka mynsiem ïaleh jong ki Samla nangne shakhmat na bynta kiba bun ki dawbah jong ka Jaidbynriew, ong ka kyrwoh na ‘Ka Sur Ki Nong Mawlai’ lyngba u Samla Rapborlang Nongrum, Samla Khrawkupar Nongsiej bad u Samla Sanbor Rapsang kiba long ki Convener.