Tuklar lem ïa ka jingbym leh eiei, ki MLA; ong ka Sur U Hynniewtrep ia ka UDP”

Shillong:KA SUR KA BRI U HYNÑIEWTREP ha ka janmiet 16 tarik, mynta u bnai, 2021 hapoh ka jingïalam u Chairman Bah Sylvester Kurbah ka la leit ban ïakynduh ïa ki Nongïalam jong ka UDP kiba kynthup ïa u Bah Bindo M. Lanong Chief Adviser, Bah Paul Lyngdoh Working President bad Dr. Jemino Mawthoh uba long u Secretary ka UDP ha ïingsah (quarter) jong u (L) Dr. Donkupar Roy.

Ka jingleit kynduh jong ka SUR KA BRI U HYNÑIEWTREP ka long shi bynta ban dawa sa na kitei ki nongïalam ba Rangbah ka UDP ba kin tuklar lem, ha kaba ïadei bad ka jingbym leh eiei ki MLA ka UDP kiba don ha ka sorkar MDA ïa ka shithi jingkyrpad ne Appeal letter kaba ïadei bad ka jingdawa pynsangeh kam shipor ne Suspension ïa ki 3 ngut ki Pulit kiba donkti ha ka jingshah dkhat jubor ka jingim u (L) Cheristerfield Thangkhiew.

Katei ka jingdawa Suspension ka long ba kum ka SUR KA BRI U HYNÑIEWTREP ka kwah ban ïohi ba ka Bishar kaba khuid kan don ha ka JUDICIAL ENQUIRY khlem da lah ban mushlia shuh da mano re mano.

Ha katei ka jingïakren bad ïa pyrkhat na bynta katei ka mat kitei ki nongïalam ba Rangbah jong ka UDP ki la kular ban shimkhia bad ban ïakren ïa baroh MLA ka UDP kiba don ha kane ka sorkar, ong ka kyrwoh na u Bah M. Dkhar
Secretary, SUR KA BRI U HYNÑIEWTREP.