Shillong: U Bah Adelbert Nongrum (KHNAM), ula leit rah mynta ka sngi, ia ka jing kylli ha iing dorbar jylla, halor ka jingkiew dor ka doh masi bad u ong ruh ba ka jingkiew dor ka doh, ka dei hadien ba ka Assam, ka la pyntrei kam ia ka ain khang bam doh masi; haba jubab ia katei ka mat, U Bah Sanbor Shullai, myntri ka tnat ri jingri, u kam, ba ka ka don ka jingkiew dor jong ka doh masi ha ka jylla ha kine ki sngi.
U bah Sanbor, u iathuh ruh, ba ula thoh shithi sha u myntri rangbah ka Assam, halor ka jing iadei bad katei ka jing duna doh masi, kaba poi sha ka jylla bad ula pyn thikna ruh, ba yn sa pyllait noh shen ia ki permit, na ka bynta ki nong khaii, ba kin ioh ban ia thied masi.
Halor ka jing kylli jong U bah Nongrum, ia ki lad jing iarap, na bynta ki nongri jingri, U Bah Sanbor, u ong, ba ki don shibun ki skhim kiba dang iaid shakhmat, ban iarap ia ki nongri masi bad ki don shuh sa shibun kiwei pat ki skhim, kiba dang sahteng bad ka sorkar India, na bynta ban ai jing iarap ia ki nongri jingri ha ka jylla.
U Bah HM Shangpliang (Congress), u kylli ruh, la ka sorkar Assam, ka la jubab ne em ia katei ka shithi, kaba ula phah u myntri, ha kaba U bah Shullai, ula ong “Ngi dang ap ia ka jubab, hynrei lada ka Assam, kam jubab, na ka liang ka tnat, ngin sa peit bad pyrkhat, ia kaei kaba dei ban leh”. U bah Shangpliang, ula kren ruh halor ka jing shalan tuh ia ka masi sha Bangladesh, ha kaba ka dor jong ka masi, kaba shongdor T.20 hajar ha Meghalaya, ka shongdor haduh T.1lak ha Bangladesh, ha ka por jong ka jinglehniam id. Halor kane u myntri, u iathuh ba ula iakren bad ki BSF, ki pulit bad ki briew jong ka tnat sorkar, ban khanglad ia kane ka jing khaii tuh.
Phi don ban ong eiei?