Shah thngan u samla na Sohra bad u bah Adelbert

Shillong, 21 Jymmang:
Mynta ka miet sa uwei pat u khynnah samla u la wan ban ia snohkti lang ha ka jingshong shah thngan bad u bah Adelbert Nongrum ryngkat u samla Goldy Warjri ha Mot Kiang Nangbah uba don hajan Civil Hospital, Shillong.
Utei u samla u dei uba la tip kyrteng kum u samla Ibankmen Bynnud Sohra, utei u samla u la don 22 snem karta bad u dei u khun khadduh jong i kong E.Bynnud bad u bah M.Rajee na ka shnong Pdeng shnong,Sohra. U dei ruh u para khadduh ba ki hynriew ngut shi para bad u dei ruh u para trai jong u President ka KSU South Khasi Hill u samla D.Bynnud.
Utei u samla u la kiew na Sohra marwei hi mynta ka sngi da ka jingmut kaba skhem ban kyrshan ia u bah Adelbert Nongrum uba dang shong shah thngan na bynta ban pynbor ia ka sorkar ba ka dei ban mynjur noh kloi ia ka Village Administration bill. Haba iakren bad u bah D.Bynnud u hynmen trai jong utei u samla lyngba ka phone u la ong ba kam shym la don kano kano ka jingkhanglad na ing na semi a u para jong u ban leit shong shah thngan bad ka dei ka jingleit jong u da ka mon lajong namar ka jingsngewkhia halor ka jingshah sloit bor ki Rangbah Shnong.
U la iathuh ruh ba u para jong u u la kut jingmut ban shong shah thngan ryngkat bad ki lai-ngut u Goldy Warjri bad u bah Adelbert tad haduh ba ka sorkar kan sngap ia ka jingdawa jong ki ban mynjur noh ia ka VAB. U la iathuh ruh ba haduh mynta ym pat don ba leit peit na ing na sem ia u na Sohra, hynrei ki don katto katne ngut ki bahaing hasem kiba sah ha Shillong kiba la leit ban synran ia u bad u la ong ba lashai ka sngi ki bahaing na Sohra kin leit khmih ia u.
Lah ban kdew ba nalor utei u samla uba la leit ban shong shah thngan ki dang bun kiwei pat ki samla bad ki kynhun seng bhang kiba la byrngem ban leit shong shah thngan ha katei ka jaka bad ka la don ruh ka jingbyrngem sa na ka dorbar shnong ban leit pynkhap ngiah shoin ia katei ka jaka shah thngan.