Ym kwah komiti ka UDP; ‘kyrshan ia ka Synjuk ki RS’

Shillong, 21 Jymmang:
Haba jubab ia ka jingkhot jingialang jong ka seng HSPDP ia baroh ki seng sain pyrthei kiba don ha ka liang pyrshah ban ia thaw da ka komiti ka ban pyrkhat ia ka kam ba iadei bad ki Rangbah Shnong, ka UDP ka la phah da ka jingthoh sha u Convenor jong ka jing ialang ki seng sain pyrthei, bad ha katei ka shithi la soi da u President Rangbah katei ka seng u Dr.Donkupar Roy ha kaba u la ong ba ha ka 3 tarik u Kyllalyngkot , 2015 ka UDP ka la khot ia ka jingialang jong baroh ki Rangbah Shnong na Khasi bad Jaintia hill, ki sengbhalang bad kumjuh ruh ki seng sain pyrthei ha ka jingialang kaba la long ha ka Communitty Hall Jaiaw Shyiap, Lum pyllon.
Ka la pynkynmaw ba ha katei ka jingialang la ia kren shaphang ka village Adminstration Bill, bad ka la thaw ruh ia ka Sub Committee ha kaba ki dkhot ki kynthup ia 5 ngut ki Rangbah Shnong u bah S.D Khongwir, Chairman Mawlai Town Dorbar, bah B.S lyngdoh, Rangbah Shnogn Riatsamthiah, bah Robert Dkhar Rangbah Shnong Lumdiengjri, bah Emlang Lytan Rangbah shnong Lumsohphoh Nongthymmai Pyllun, bad bah B.Pyngrope Rangbah shnong Nongrah kynthup u bah Bindo M Lanong uba long u Convenor.
La thaw ia katei ka komiti ba kan beit bniah ia ka VAB bad ban pynrung ia ki mat ba dang donkam bad kumjuh ruh ban weng noh ia ki bym lerkam, bad ia kitei ki mat dei ban phah sha ka KHADC ba kan leh ia kaba donkam. Hadien ba la dep pynbit pynbiang ia kaba donkam katei ka komiti ka la phah ia ka jingai jingmut sha u CEM ka KHADC u bah Adelbert Nongrum ha ka 3 tarik u rymphang ha ryngkat ka jingiadonlang ki dkhot EC ka ARPA, la ong ka shithi ba la soi u Dr.Don.
Shuh shuh katei ka jingthoh ba ka la UDP ka la thoh sha u Convenor ka la ong ba ki la io hjingtip ba ka Synjuk Ki Rangbah Shnong kin pynlong da ka jingialang paidbah ha ka 30 tarik mynta u bnai ha Madan Student ban ia kren halor katei ka mat. Ka la ai jingmut ia ki seng sain pyrthei ba kan bha ba kin kyrshan lang ia ka Synjuk Ki Rangbah namarba ki ia ieng lang ha ka juh ka phang kata ba ka sorkar ka dei ban mynjur noh ia ka Village Administration Bill.