Weng, ka seng Congress ia ka jingtyrwa bym shaniah, pyrshah ia u Lamphang ka ïing dorbar thawaiñ

Shillong: Hadien ba ka seng Congress kaba shong sha ka liang pyrshah hapoh ka ïing dorbar thawaiñ ka jylla ka la wanrah ia ka resolution ban weng ia u Bah Metbah Lyngdoh na ka shuki Lamphang jong ka ïing dorbar thawaiñ bad u Dr Mukul Sangma u ba dei u nongialam jong ka liang pyrshah hapoh ka ïing dorbar thawaiñ u la ong ba ka jingwanrah jong ka seng Congress ia ka jingbym don ka jingshaniah ne ka No Confidence Motion pyrshah ia u Lamphang jong ka ïing dorbar thawaiñ kam dei satia halor ki daw shimet, hynrei la wanrah ia katei ka resolution na ka bynta ka jingmyntoi jong ki paidbah ka jylla baroh kawei; hynrei ha ka 14 tarik u bnai Nailur 2021 ka seng Congress ka la pynbna ba ka la weng noh ia katei ka No Confidence Motion pyrshah ia u Lamphang ka ïing dorbar thawaiñ.

Haba kren sha ki lad pathai khubor, u Dr Mukul Sangma u la ong ba ia ka resolution ba la phah sha ka Assembly Secretariat katkum ka kyndon jong ka Rules of Procedure and Conduct of Business bad lyngba ka kyndon kaba 179 jong ka riti synshar jong ka Ri India la weng noh namar u la ong ba ka Congress kam sngew donkam shuh ban wanrah ia katei ka resolution, hadien ba ka la iohi ba ia kiba bun ki mat la wanrah hapoh ka ïingdorbar ban iakren.