Kyntu u Saleng, ban nym aireng pyrshah ia ka ïing ka sem U Bah SK Sun; ha ka elekshon shiteng samoi ha Mawphlang

Shillong:Hadien ka jingkhlad ba kyndit kynsan jong u MLA ka Mawphlang Constituency u Bah SK Sun u ba la khlad noh ha ka 10 tarik u bnai Nailur 2021, kum ka dak ban kynmaw burom ia une u MLA ba la khlad noh, na ka liang u MLA ka Nationalist Congress Party(NCP) u ba dei na Gambegre, u Saleng A Sangma u la kyntu hapoh ka jingdorbar thawaiñ ha ka por ba dang don ka Dorbar Synrai ban ailad beit ia ki bahaïing hasem jong u Bah SK Sunn ban iakhun ia ka elekshon shiteng samoi na Mawphlang Constituency, lada ki don ka jingthmu ban pynmih kyrtong na ïing jong ki bad ia kane ka jingong u Saleng A Sangma u la ong ha ka por ba la pynlong ka jingkynmaw burom ba kyrpang ia u Bah SK Sun.

U Saleng u la ong ba kum ka dak ban pynpaw ka jingsngew burom ia u MLA u ba dang shu khlad shen, baroh ki seng saiñ pyrthei hapoh ka jylla kim dei ban buh kyrtong pyrshah ia ka ïing ka sem jong u SK Sun bad ba dei ban ailad beit ia ka ïing ka sem jong u Bah SK Sun ban mihkhmat na katei ka thaiñ.