Shillong:Myn hynnin ka shiteng sngi, kyndit kyndit ki nong ialang jong ka Sur ki nong Mawlai, ha kaba la ia lam da u bah Donbok K Lyngdoh, u bah Marbud Dkhar, ki la wan bret da ki bun spah tylli ki tari khoh kwai, ba ki la ioh lum na Mawlai, ha ka prokram pyndem tari kaba la long ha ki khyndiat sngi ba ladep.
Ia kitei ki tari, ki la leit bret ha khyrdop ka Secretariat ha kaba shipor ki la shong kyllaiñ myngngor ha khmat ka Secretariat ban halla bad dawa ban sospon ia ki pulit ba siat ia u GS barim ka HNLC artat ha ka juh ka por ki la rwai ka jing rwai ieid ri, “Ri Khasi Ri Khasi, nga ieid iapha”.
Kane ka jing tur kynsan kynsan ka sur ki nong Mawlai, ka la pyn kyndit thret ia ki pulit ruh, kiba pahara ha sawdong ka Secreteriat.
U bah Donbok K Lyngdoh, haba kren sha ki lad pathai khubor, ba kane ka sorkar MDA ka dei ka sorkar mrad, namar ka ieid ia ki mrad ban ia u briew, kane ka long namar ba ia ki briew kiba pyniap ia ki mrad ki phah thwet, ki phah kem kat ba ia ki briew ki ba pyniap ia u briew ki ri ki da.
Shuh shuh u la ong ba ka sorkar kam shem la nud ban sospon ia kitei ki pulit bad kane ka pyni, ba ka sorkar ka kwah ban ialam ia u ksai ka jing bym shong suk shong saiñ ha ka jylla bad ula ong ruh ba mynta ki la iohi, ia ka jing kyrshan jong u paitbah ia ka sur ki nong Mawlai bad kumta ka sorkar kan sa iohi ia ka jing ia khih ha ka Bri u hynniew trep.
Phi don ban ong eiei?