Shillong:U MLA ka North Shillong u bah Adelbert Nongrum u la ong wat la ka sorkar ka la dep ban thung ia ka kynhun tohkit halor ka jingjia ha ka ba ki pulit ki la siat iap ia u bah Cheristerfield Thangkhiew,hynrei mynta hi ka sorkar ka dei ban sngap ia ka jingdawa jong ki paidbah ban weng kam shipor ia ki heh pulit ki ba donkti ha ka ne ka jingjia.
U bah Nong rum u la ong ba ka na ka liang ka sorkar ka la pyniaid bakla hi naduh nyngkong, ha kaba ka la don ka jingbthat jubor ia ka jingim u bah Thangkhiew bad mynta ka sorkar ka dei ban kam ia la ka jong ka jingbakla bad ka dei ruh ban pyrkhat ia ka jingsngew jong ki nongshong shnong namar ba ka jingdawa jong ki, ka dei kaba don nongrim ban weng kam shipor ia ki heh pulit ban don kata ka jingtohkit kan long kaba khuid ba suba.
U la ong ruh naduh nyngkong haba phai halor kane ka jingjia ka la don ka jingsuba bad ka jingbuh jingkylli halor ka kyrwoh ka ba la wan na u Myntri rangbah U Conrad K Sangma,u Myntri kam pohing u bah Lahkmen Rymbui bad kumjuh na u Director General of Police (DGP) u R Chandranathan.
“Ka la buh lupa ia ka jingkylli ha kaba na ka liang u DGP, u la pynpaw ba ka jingphah ia ki pulit ka long ban kem ia u bah Cheristerfield Thangkhiew hadien ba la ioh ia ki sakhi satar ba biang, na ka liang u Myntri rangbah u la kubur ha ka kyrwoh ba la bthah ba dei ban shu kem ong kat ba na ka liang u Myntri kampohing u la pynpaw ba ym don jingtip eiei halor ka ne ka jingjia te mynta iano yn kynnoh”u la bynrap.
U bah Nongrum u la ong ba ka jingshah pyniap jong u bah Cheristerfield Thangkhiew ka la long kumba ki la shu buh ia ka suloi ha tyrpeng u bah Lahkmen Rymbui bad siat da u wei, iano yn kynnoh halor kane ka jingjia, kumta ban lap ia ka jingshisha dei ban weng kam shipor ia kine ki heh pulit shuwa ban sdang kane ka jingtohkit.
Kane ka sorkar kam khuslai khyndiat ruh ia u paidbah namar u cm u tip ba ki khasi ki buaid spah u theh da ka spah lute ba ki ioh na u dewiong da ki hajar klur ban pynskhem ia ka shuki jong u.