U Babu Wilson Reade

Da U Spiton Kharakor

U Babu Will ia uba la khot ieid ruh kum u Kongor Will u la khlad noh ha ka 9 tarik u September 1971. Mynta la dap 50 snem pura. U la long u riew ieid Ri bad u riewkhraw jong ka jaitbynriew jong ngi ha ki babun ki liang. La kha ia u ha ka snem 1878. U la don sa uwei u para jong u uba kyrteng u David Roy. La kha ia u ha Laban, Shillong ha ka 23 tarik u December 1884. I kmie jong ki I dei I Kong Ila-in-shab Phanwar, iba dei I nong Mairang. Ila pynheh pynsan iala ki khun ha Laban, tad haduh kin da kynriah sah noh sha Mawkhar. Nyngkong I Babu Will I la leit skul ha Laban.

I Babu Will ynda I la san la rangbah ila leit rung trei sha ka kam Ophis Sorkar, hikai skul, bad I la trei de ia ki kam Balang. U la aiti ruh met bad mynsiem ia ki kam paidbah. U para jong U kata u bah David Roy ula trei kam sorkar kum u Ophisar Extra Assistance Commissioner ha ka Ophis u Deputy Commisioner United Khasi & Jaintia Hills. Hapdeng ki snem 1936 haduh 1946 u la bat ia ka kam kum u Dewan ne u Administrative Ophisar ha ka Hima Mylliem, Hima Mawphlang bad Hima Sohra. U la long u nongthoh kot uba pawnam, u la long de u dkhot ka M.B.E. ne u member jong ka British Empire.

U Babu Will ula pass ia ka Examine “Minor” ne class VI ne ha ka snem 1895. Kiwei ki khynnah ba ia pass lang bad I ha katei ka por, ki long U Babu Mondon Bareh bah Satonmen Blah kong Dwelsimon bad ki kong Sanimon iba dei I kmie jong I kong Aida Lyngwa.
Hadien kata, I Babu Will I la leit skul noh ha Shillong Govt. High School. Ha kata ka por, u Head Master jong katei ka skul u dei u Sahep Credic (Rev. J.C. Evans). I Babu Will I la pass ia ka “Entrance” examination (Matric ne H.S.L.C. mynta) ha ka snem 1898. La ialeh 5 ngut ki khynnah khasi ha katei ka por, hynrei dei tang I Babu Will napdeng jong ki iba la pass. Ki khynnah ba ialeh entrance ha kito ki por ki hap ruh ban shim sa kawei ka subject napdeng ki ktien Arabic, Greek, Sanskrit bad Latin. I Babu Will I la shim Subject da ka ktien Latin.

Nangta pat I Babu Will I la hiar sha Calcutta. I la leit rung pule ha ka Free Church Institute Duff College. I la pule tang shipor bad I la hap wanphai noh sha Shillong. I Babu Will I la long uba donbok ha ki sngi ka jinglong khynnah jong u . Namar ba 20 snem mynshua ym pat ju don High School Shillong. Toi, ia ka Nongbah Shillong la pynlong ka Head Quarters ne ka Nongbah ka Assam naduh ka snem 1874 A.D. Hynrei ka Sorkar Assam kam shym la thaw ia ka High School na ka bynta ka jingmyntoi ki Samla shong School kiba pule shalor ha Shillong.

Te U Babu Jeebon Roy jait Mairom u la sngewkhia jingmut ia ka lawei jong ki khynnah skul. Te, U la sei na ka pla lajong haduh Rs. 700.00 (Hynniew Spah Tyngka). U la seng ia ka Private Proceeding High School ha Shillong ha ka snem 1876. La tei ia ka hajan ka Ophis Telegraph (ba mynshuwa bad mynta kadei ka Ophis Telecom ha Secretariat Hills Shillong). U Sib Charan Roy jait Dkhar Sawian u la long uba nyngkong ban pass Ia ka Examine Entrance ha ka snem 1880 A.D. Kawei na ki Subject ba u Bah Sib u la shim Subject ka dei ka ktien Sanskrit.
Ka Sorkar Assam ka la pynmih hadien ia ka High School Sorkar. La pyniasoh lang ia lai tylli ki Skul kum ka Mission School, ka Normal School ba wanrah na Sohra bad ka School Private jong u Babu Jeebon Roy. La kyllum lang ia kitei lai bad la pynmih ia ka Shillong Govt. High School ha ka snem 1880. U Babu Will um sngew juh ia ka kam Sorkar kaba u la trei ha D.P.I. Assam u la phet noh tang 5 snem. Nangta u la leit rung kam hikai noh ha ka Welsh Mission School ha Mawkhar ha ka snem 1907. U la long pat kum u Head Master jong katei ka School ha ka snem 1912. Nangta pat la kyntiew ia kane ka School sha ka kyrdan High School ha ka snem 1947. I la iailong u Head Master jong ka School Mawkhar Christian High School tad haduh ba in da shongthait ha ka snem 1968.

Nalor ki kam hikai Skul, I Babu Will I la ia don bynta ha kiwei ki jaitkam de. I la long U Share Holder jong ka Shillong Hydro Electric Co. Ltd. naduh ka snem 1920 haduh ka snem 1971. La shimti da ka sorkar Meghalaya bad la aiti ha ka Meghalaya Electricity Board (Me.S.E.B) I la long u dkhot jong ka Board of Director jong ka Company lynter ryngkat bad u Dr. Bidhan Chandra Roy uba long u nongseng ia ka Suna Pani Power House Shillong naduh ka snem 1922. U Dr. B.C. u la long teng u Chief Minister jong ka West Bengal hadien ka jingioh laitluid ka Ri India. U Babu Will u la long de uwei napdeng ki Nongseng ia ka Khasi National Dorbar naduh ka 4 tarik u September, 1923. Mynta kane ka Iing Dorbar jong ka jaitbynriew ka la dap 98 snem. Sa tang 2 snem kan ioh rakhe ia ka jingdap 100 snem pura. U President ba nyngkong jong ka Khasi Nation Dorbar u dei u Pa’iem Join Manik jong ka hima Sohra.

Ia I Babu Will la jied Tymmen Basan ia I lyngba ka Jingiaseng Presbytery ha ka snem 1939. Ha kajuh ka snem I Babu Will I la long U Moderator jong ka Shillong Presbytery. Shuh shuh I la long de sa u Secretary jong ka Assembly haduh 3 snem. I Babu Will I la long U Riew Ialeh u bym ju pyndem tdong u la shah jied M.L.A. ha ka snem 1962 sha ka Assam Assembly. Nangta u la iehnoh pat ban pyni ia ka dak ka jingsngew pyrshah ia ka Assam U la long teng un Chief Executive Member ne C.E.M jong ka United Khasi Jaintia Hills Autonomous District Council ha ka snem 1966-67.
I Babu Will ila don bynta bad ka Federation of Khasi States naduh ka por ba seng ia ka ha ka 22 tarik u August 1946. Shisnem hadien kata ki phareng ki la ai jinglaitluid ia ka British India. Kumjuh ruh ki la ai jinglaitluid ia ki Hima Syiem (Princely State) kiba don baroh 562 tylli ki hima. Kumta ki Khasi State 25 tylli ki la ioh laitluid kum ki Sovereign State laitluid haka 15 tarik u August 1947. U Sir Akbar Hyderi U Governor Assam, U la wan jngoh sngewbha ia ka Head Quarters bad Ophis jong ka Federation Of Khasi State ha Riatsamthiah ha ka 16 tarik U August 1947.

Ka Assam province ha kito ki por shuwa ka Independence 1947 ka kynthup ia ka Bramaputra Valley, ka Surma Valley bad ki Hills District lait noh ki Khasi State la phiah ia ka British India da ka Niam ha ka snem 1947. La kad ar liang ka jylla Punjab bad Bengal ba ki ia shong khleh ha ka niam Hindu bad Musalman. Ka West Bengal Hindu bad East Punjab ki la hap noh sha ka Ri India katba ka East Bengal bad West Punjab ba heh paid ki Musalman ki la leit noh sha Pakistan. Kane ka pynkynmaw ba ka Sorkar Bilat ka la ai laitluid ia ka Ri Ireland ha Europe ha ka snem 1925. Ka Ri Ireland ka ngeit tang ha kawei ka niam Kristan. Hynrei la phiah ia ki ha ki ar tylli ki Balang. Ka Balang “A” ka ioh ia ka jingsynshar kum ka Ri thymmai ka Irish Republic. Katba ka Balang “B” la ai kyrteng ia ka kum ka Northern Ireland bad la pyniasoh ia ka bad ka United Kingdom. Ka thma hapoh iing hapdeng jong ki ka la neh la palat 28 snem. La pynpait ia ka Ri Ireland ba mynshua da ki Balang Niam ba iapher haduh mynta.
U Priemier Gopinath Bordaloi u la long U Premier ka Assam ha ki snem 1946-47. Une u Premier Gopinath Bordaloi u long uba shalak buittuh bad uba iohi jngai. U la I Sheptieng ba ka Surma Valley ne Sylhet District kan hap noh ha Ri India. Ba mar ia biang paid hapdeng ki Bengali Hindu bad ki Bengali Musalman. Te, u la weng noh ia ka Karimganj Civil Sub Division na ka Sylhet District ba long majority Bengali Hindu ioh kin Vote sha ka Assam. La pynlong ia ka Referendum ne ka Opinion Poll ha shuwa ka Partition 1947. Shisha la jop ki Musalman bad ka Sylhet District ka la leit hap noh sha ka East Pakistan. La kmen bad la shad risa U Gopinath Bordaloi.

Hadien kata, la pynkhreh ban thaw ia ka Constitution ka India lyngba ka Constituent Assembly New Delhi. Ki dkhot jong ka Constituent Assam ki la ther tyngeh ban pynsngewthuh ba ka Sixth Schedule ka long ka ba bha tam ia ki Non-State Hills District ha Assam kum ka Naga Hills, Lushai Hills Garo Hills. Hynrei ka Khasi State ka la duh noh ia ka kyrdan Khasi State. La pynhiar kyrdan ia ka sha ka United Khasi Jaintia Hills tang kum ka District hapoh ka United Khasi Jaintia Hills Autonomous District Council. La duh ka Khasi State sha bymju kut bad sa hap ialeh Hills State hadien. Kumta ka sngi Republic Day ba nyngkong 26 u January 1950 ka long ka sngi ba kthang tam jong ka jait bynriew Khasi kum ka Black Day ba nyngkong naduh ba ioh Independence 1947.
Ha ka 13 tarik u April 1951 U A.D Pandit Chief Secretary ka Assam u la pynbna paidbah ba la knieh noh ia ka Block I bad Block II na ka Ri Jaintia. La ai sngewbha ia kitei ki Block ar tylli sha ka United Mikir & North Cachar Hills sha Assam. Shuwa ia kane U Bisnu Ram Medhi M.Sc.Bl, Chief Minister ka Assam u la pynmih ia ka notification No. TAD/ R/3150 Dt 3.October 1950 ban phiah ia ka Ri Jaintia. Tang 5 bnai Khatwei sngi ne 161 sngi U la trei smat kloi ban knieh ia ka Block I bad Block II na ka Ri Jaintia.
U paidbah ka Ri Jaintia um shym la phohsniew ne ioh jingtip biang por ba ka treikam ban shna District thymmai. U Mr C.S. Booth U long u Secretary jong ka Boundary Commitee. Nangta wat u Ma Soren Bareh ruh imat u ioh jingtip dier por ia ka jingthmu shet kylla jong U Bishnu Ram Medhi. Kumta um shym la ialeh pyrshah ne rah wait rah stieh kum u Kiang Nongbah U Tirot Sing bad ka Phan Nonglait hyndai ha ka thma Nongkhlaw 1829-33. Haduh 143 tylli ki shnong jong ka Block I bad 213 tylli ki shnong jong ka Block II ki la kie berong sha ka United Mikir bad North Cachar Hills. La duh ei haduh 1543 sq km na ka Ri Jaintia. Ki M.L.A. ba mih khmat sha ka Dorbar Assam Assembly na U.K. Hills 1946-51 ki long U Rev. J.J.M. Nichols Roy uba long M.L.A. na ka Shillong Constituency U long ruh artad U Cabinet Minister jong ka Sorkar Assam. Ka Kong Bonily Khongmen ka long M.L.A. na ka Women Constituency kaba na ka Block II. Sa uwei pat u M.L.A. udei u Ma Larsing Khyriem na Jowai.

U Babu Will u la iaid lyngba shibun ki jingduh jingkyrmen bad jingsohsat ha ki por ki jingdawa ka Hills State naduh ba la jah kyrteng ka Khasi State. Hynrei U iai ialeh bad um ju shongthait. La seng ia ka Seng Ialeh Hills Stateba nyngkong lyngba ka Eastern India Tribal Union ne E.I.T.U lyngba ka Election Paidbah ha ka snem 1957 sha ka Dorbar Parliament bad ka Assembly ka Assam. Dei ha kane ka Election 1957 ba ka seng E.I.T.U ka la pynjop ia u Bah Hoover Hynniewta kum u M.P Khasi ba nyngkong sha ka Lok Sabha lyngba u “Symbol” U Syiar Ryngkuh. Kiwei ki M.L.A. ba la jop lyngba ka seng E.I.T.U. ha ka Election M.L.A. 1957 ki long u Rangbah Brojo Mohan Roy na Shillong. U Ma Larsing Khyriem na Jowai bad u Rangbah Henry Cotton na Nongstoin. U Candidate jong ka E.I.T.U. Rangbah Theodore Cajee u la shah jop tang 188 vote ha u Rev. J.J.M. Nichols Roy U Independence Candidate uba kwah ban iaisah ha ka Ri Assam lyngba ka Hills Ministry jong U.

Khatduh, I Babu Will I la sei da ki bun spah ngut ki khynnah ba proh jabieng hapoh ka jinghikai jongi. Kine baroh ki la long briew lyngba ki kam hikai skul jongi uwei na kita u dei u Bah Rishandro Kharlukhi ( bam Kwai ha dwar U Blei) na Mawlai. Une u bah Rishandro U la pass ia ka Examination U.P.S.C ha ka Indian Administrative Service ne I.A.S (R.R). U la trei kam kum u I.A.S. Ophisar ha ka West Bengal Cadre. Sa uwei pat u khynnah skul jong I Uba kyrteng u bah Govanon Nongbri na Malki, uba la pass ia ka kyrdan Post Graduate Degree ha ka Chemical Engineering na Ri U.S.A. U la treikam kum u Scientist ha Ri America haduh ba un da shongthait. U la sah mynta ha ka Ri United State Of America.
Ka jingleit ai memorandum daw Hill State jong u ha ka snem 1952 ka long ka jingsdang jong ka jingialeh bad jingjop ka khun jong u Nehru ka Prime Minister ka wan plie ia ka jingsdang ka Meghalaya Hill State ha madan Polo ha ka 20 tarik January 1972 ka long ka jingkmen ia baroh. La wan sakhi da u paidbah uba bun byllai haduh shilak ngut eiei.
Ioh ngi klet U Babu Will u la long teng U Ward Commisioner jong ka Mawkhar Ward haduh 15 snem. Ula long ruh u Vice-Chairman uba nyngkong napdeng ki Khasi ha Shillong Municipality Board. U la ioh ia ka Khusnam National Award na ka kti jong U President ka Ri India ha ka snem 1964.
To ai ba ka Mynsiem Ksiar jong I Babu Will kan iai shongthait Junom ha Dwar U Blei.