Thaw sorkar ki ehrang Taliban, u ehrang ba satar, kum u myntri kam poh iing

Ki ehrang Taliban, ki la thaw sorkar hynnin ka sngi ha Afghanistan bad katei ka dei hadien ba ki la ioh kurup ia ka Kabul, ha ka 15tarik Nailar 2021 bad kaba la pynlong ia U President Ashraf Ghani jong ka Afghanistan, ba un phet krad ialade na katei ka Ri.

U nongkren jong ki ehrang Taliban, U Zabihullah Mujahid, u iathuh ha ki kotkhubor, ba la khlieh ia ka sorkar da U Mullah Hassan Akhund.

Kane kan dei tang ka sorkar kaba shipor bad kam dei satia ka sorkar kaba neh slem, ong U Zabihullah Mujahid.

U Mullah Hasan Akhund, un dei u khlieh jong ka sorkar Taliban, katba ki arngut kin dei ki ban don hapoh ka jing trei kam jongu bad kitei ki kynthup ia U Mullah Abdul Ghani Baradar bad U Mawlavi Abdul Salam Hanafi.

U Sirajuddin Haqqani, uba dei uwei na ki snar lehnoh, ba la ithuh da ka pyrthei, un dei u myntri kam poh iing jong ka sorkar Afghanistan bad u dei ruh u nongialam jong ka kynhun ehrang kaba la ai kyrteng Haqqani Network.