Ar sngi kynthih shah thngan U CEM ba rim, ha u mot Kiang Nangbah

Shillong 17 Jymmang:
U CEM barim ka KHADC u Bah Adelbert Nongrum lem bad uwei u samla Goldy Warjri ki la pynlong ia ka jingshah thngan naduh kane ka sngi Saitjain ha u Mot Dur jong u Kiang Nangbah ba don hajan ka Shillong Civil Hospital bad ha kane ka sngi Blei ruh u la shong beit ban shah thngan ha katei ka jaka khlem kynran dien.
Hynrei namar ka jingbym shah ka bor synshar district ban shah thngan haduh ban da iap, u Bah Nongrum u la shim noh da ka lynti ban shah thngan khlem buh por ban pynkut.
Katkum ki bor synshar district, ka jingshah thngan haban da iap, ka dei ka jingthmu ban pyniap hi bad kane ka long pyrshah ia ka ain.
U Additional District magistrate ka East Khasi Hills u Bah Ronnie Wahlang u la ong ia u Bah Nongrum bad ia u samla Warjri ba ki lah ban shah kem, lada ki shah thngan ha ban da iap, kat kum ka kyndon 309 ka ain IPC.
 ”Ngim lah ban ailad ia ki ban shah thngan haban da iap namar ba ka kdew sha ka jingthmu ban pyniap hi. Ym don ba lah ban pyniap hi”, la ong u Bah Wahlang.
Halor kane, na ka liang u Bah Nongrum u la pan bor ban pynlong noh da ka jingshah thngan khlem buh por ha jaka ban shah thngan haduh ban da iap.
Halor kane, ka bor synshar district ka la shah ia u Bah Nongrum bad ia u samla Warjri ba kin pynlong ia ka jingshah thngan ha katei ka jaka.
Hynrei, u Bah Nongrum u la ong ba ka ktien shah thngan haban da iap bad shah thngan khlem buh por, ka dei ka juh.
“Ngam nym sangeh ia ka jingshah thngan khlem buh por haduh ba ka sorkar kan pdiang ia ka Village Administration Bill, 2014 kaba la phah da ka KHADC,”  la ong u CEM barim ka  KHADC.
U la ong ba ka sorkar jylla kam lah ban thaw ain ia ki bor shnong namar ba ka dei ka kamram jong ka Council.
”Ngi la thaw ia ka ain katkum ka Sixth Scheduled ka riti synshar ka ri.  Lada ka sorkar ka pyrshang ban thaw ia ka ain ia ki bor shnong bad rangbah shnong, ka la wan skud ia ka bor jong ka Council,” la ong u Bah Nongrum.
”Ka sorkar ka dei ban pdiang noh ia kane ka Bill khlem jingpynslem shuh”, la ong u Bah Nongrum.
Katba u samla Warjri ba 32 snem na Lumdiengjri uba la rai ban shah thngan bad u Bah Nongrum u la ong “Nga don bad u Bah Nongrum halor kane namar ba nga sngew kumjuh kum ma u kaba ktah ia ka bor synshar shnong jong ngi. Nga don hangne ban kyrshan ia u jia katba jia”.
Hynnin ka sngi ki dkhot ka KHNAM, kiba haiing hasem, ki paralok jong u Bah Nongrum bad u Bah Warjri ki la wan ban synran ha ka jingshah thngan jongki ha katei ka jaka.