Pan jingshai ka DC Shillong, na ka sur ki nong Mawlai, ba ki pynkhein kyndon covid

Shillong: Ka Deputy Commissioner, East Khasi hills District, hynnin ka sngi, ka la pan jingshai, na ki nongialam jong ka Sur ki nong Mawlai, halor ka jing kynnoh, ba ki pynkhein ia ki kyndon iada na ka jingpang khlam covid 19.

La bthah ia ki nongialam ka Sur ki nong Mawlai, ba kin pynpoi ia ka jubab, ha shwa ka 6tarik Nailur 2021.

Kiba la ioh pdiang ia katei ka shithi, ki long U bah Sylvester Kurbah, Rangbah Shnong Mawlai Phudmuri, Bah Marbud Dkhar, bah Khrawkupar Nongsiej, President FKJGP na Mawlai, Bah Donbok Kharlyngdoh, President HYC na Mawlai, Bah Samuel Biam, President ka Seng Samla Mawlai Pyllun bad U bah Charlie J Rani, President UHM.

Ka jingpan jingshai jong ka DC, ka dei halor ka jing ialang thang tyngshop, ha ka 25tarik Nailar bad nangta, sa ka jing ia thang mombati, ha ka 27tarik Nailar 2021. La kynnoh ruh ba ha ka 25tarik Nailar 2021, ki la don kumba 1,500ngut kiba shim bynta ha katei ka jingialang paidbah, katba ha ka jingialang thang mombati, ki don 1,000ngut kiba shim bynta.