Sah kut ka kali Swift ha shiteng riat, hadien ba ka la ia tynrah bad ka trok dumper

Shillong: Ha kawei ka jingjia aksiden kaba la jia hapdeng kawei ka trok dumper bad kawei ka kali Maruti Swift, kaba la jia ha ka sngi Palei kata ka 2 tarik u bnai Nailur 2021 ha ka por kumba 1 baje shipawa ha Iew Mawiong ka jaka kaba don harum jong ka Laitlyngkot.

Katkum ki khubor kiba la ioh lum la iathuh ba katei ka trok dumper kadei kaba don ia u rejistration nombar ML 05 Q 3966 bad ba la niah da u Bah Tyngshaiñborlang Lyngkhoi bad la iathuh ba katei ka trok kadei kaba wan na ki thaiñ Laitlyngkot katba katei ka Swift pat ka dei kaba don ia u rejistration nombar ML 05 Q 9324 bad ba la niah da u Bah Jamesborn P Khongshun bad kadei kaba dang wan na ki thaiñ Pynursla.

Ha katei ka jingjia iatakhuh kali ki la don arngut ki briew kiba la mynsaw kiba shong hapoh katei ka kali Swift ia kiba tip kyrteng kum u Wanthiang Diengdoh bad u D Suting bad la pynkit noh ia kitei ki arngut sha ki jaka sumar. Ha katei ka jingjia la iohi ruh ba katei ka Maruti Swift ka la sah kut ha shiteng jong ka riat hadien ba katei ka Trok dumper ka la tynrah ia ka bad katkum ki khubor ba la ioh lum la iathuh ruh ba katei ka trok dumper ka dei jong ka kompani NHIDCL.