Ia takhuh lai tylli ki kali ha ka thaiñ Waheh Mawpat

Shillong: Ha miet jong ka 1 tarik u bnai Nailur 2021 ha ka por kumba 6 shiteng eiei ka la don ka jingjia aksiden ha ka thaiñ Waheh Mawpat kaba la jia hapdeng ka Bolero Pickup bad ka Trok bad kawei ka taksi kamai pat kaba bud nadien jong katei ka Trok ka la leit ban tynrah beit beit ia katei ka trok nadien namar ba katei ka jingjia aksiden ka la jia kynsan ha ka por ba ka dang iaid ba kumta katei ka taksi kamai ruh kam shym la lah shuh ban tehlakam ia u brake.

Ha kaba iadei bad kane ka jingjia ym shym la don mano mano ba mynsaw hynrei tang ki jingjulor jong kitei ki laitylli ki kali. Na ka liang jong ki pulit marsyn ioh jingtip halor kane ka jingjia ki lah wan bran bran sha kane ka jaka bad ki la pynlong ruh ka jingtohkit kaba bniah halor kane ka jingjia aksiden.