U paidbah, ula duk ka sorkar te ka la riewspah

Sngew sangsot, haba ki rangbah ka Hima Sohra, ki iathuh ia ka jing shem pap jongki, na ka daw jong kane ka khlam bad la iathuh ba tang ha ki lai bnai ba ladep, ba la khang ia ka kam shang pyrthei, ki la shu bret kai ha madan haduh T.3klur eiei.

Ka sorkar India bad ka sorkar jylla, ki ju pynshlur ia ka kam shang pyrthei, hynrei ha shiteng lynti, la iohi, kumba ki ksih syndon na pdot jong ki riew ieid ia ka kam shang pyrthei ha Sohra bad ha ka jylla hi baroh kawei.

Kam dei tang kata, hynrei, ka long kaba sngew kyndit, ban iohi pat, ba katba u paidbah u nang duk, hynrei ka sorkar, ka la nang riew spah shi katdei, lane ha kawei ka kyntien, ba ngi lah ban ong, ba ki khun te, da ki jain jot, ka kmie pat, da ki jain thymmai suda bad katei ka dei, halor ka jing pynmih khubor jong ka tnat lum khajna jong ka sorkar jylla, ha U Nailar ba ladep, ha kaba ka pyni, ba ka jing lum khajna, ka kiew ha u snem 2021, ban ia kaba long ha u snem 2020.
Ka sorkar, ka dei ban lehrain, ban pynmih ia kum katei ka khubor, namar ba ka la shu nion ia u luk u lak, ka la shu nion, ia kiba trei kam lajong, ha kaba ka khajna petrol, ka kiew stet arted, ka jingkiew dor ki mar ba kongsan bad sa kiba trei kam lajong, kiba shah sangah ha ka jingsiew khajna GST, kaba kin hap ban bynda ia la ki tiar ki tar, tang na ka bynta ban siew ia katei ka khajna bad lehse ki nong Sohra, ki hap lang ha katei hi ka sohsat.

Kaba sngewsih, ka long ba ha kaba kum kane ka por jong ka khlam, ki rai kiba bun ki mih na ka sorkar, na ka bynta ban plie ia ki projek, ki bym don jing iasnoh eiei bad u luk u lak, hynrei, la iohi, ba wat haba ki leit sha Delhi ban iakren bad ka sorkar India, kam ju rung satia ha ka jabieng, ban iarap ia u paidlang ka jylla, ha kaba kum kane ka kutlad.
Ki para ri, kim dei ban klet, naduh mynta ka sngi, ba ngin sa ia peit kai ia ka election affidavit jong ki myntri sorkar, kiba mynta, ki MLA, ki MP bad ki MDC (ki ban ialeh MLA) bad kata ka long, la ka jingkiew spah jongki, kan kiew haduh katno ha ka elekshon 2023 bad lada ka kamai jong ki myntri sorkar, ki MLA ka la kiew shisha, kumta katei ka pyni, ba u paidbah te ula duk, hynrei kam dei shuh tang ka sorkar, hynrei ki myntri sorkar jylla bad ki nong mihkhmat paidbah te ki la nang riew spah.