Siat iap ki ehrang Taliban, ia 12 ki shipai bad 2 ki riew paidbah

Ki ehrang Taliban, ki la siat iap ia 14ngut ki briew, kiba dei na ka jait bynriew Hazara, kaba don ha Khadir district jong ka jylla Daykundi jong ka Afghanistan. Kitei kiba la shah siat iap, ki kynthup ia 12ngut ki shipai, kiba la pyndem wait ialade bad sa 2ngut ki riew paidbah.

Katei ka jingjia, ka dei hadien shibnai, ba ki ehrang Taliban, ki la pyniap ia 9ngut ki riew paidbah jong katei hi kajuh ka jait bynriew bad nangta ki sa lute bad pynjot lut ia ki iing ki sem jongki, ha ka jylla Ghazni, kaba la jia ha u naitung ba ladep, ong ka kaiphod jong ka Amnesty International.