Mar ia lait phatok, byrthen pynjur jingiakhih U President KSU

Shillong, 15 Jymmang:
U President ka Khasi Students’ Union (KSU) u Bah Daniel Khy riem u la lait na phatok mynta ka sngi, hadien ba la shim jamin hadien phra sngi ba la shong ha phatok naduh ba shah kem haka 7 tarik Jymmang.
Ha kajuh ka por u la byrngem ban pynjur ia ka jingiakhih lada ka sorkar kam pynurlong ia ki jingdawa jong ki sengbha lang ban pyntreikam noh kloi ban tehlakam ia ka jingwan ki briew nabar bad ruh ban pdiang ia ka Village Administration Bills ban pynkupbor ia ki rangbah shnong hadien ba la shah sloit ia ka iktir ha ka kashari  Meghalaya high court.
Ia u Bah Khyriem la wan pdiang sngewbha da kiba haiing hasem, ki dkhot sengbhalang bad ki nongialam jong ki 13 sengbhalang na phyllaw ka Shillong District Jail ha kane ka sngi Thohdieng.
Ia U President ka KSU la kem ha ka 7 tarik Jymmang bad la phah set 14 sngi hadien ba u la kyntait ban shim jamin ba la hukum ka kashari Special Court halor ka jingkynnoh donkti ban pynjot ia ki mar ki tiar ha ka por ba iakhih ILP ar snem mynshwa.
U Bah Khyriem u la lait hadien ba ki 13 seng ki la pan jamin hadien ba ka sorkar ka la rai ban weng noh ia ki mukotduma ba la pynngat ia ki ha ka por ba iakhih ILP ha u snem 2013.
Hadien ba la mih na phatok, u Bah Khyriem u la ong, “Kane kam dei kaba kut, nangnge shakhmat kan don ka jingiakhih kaba jur lada ka sorkar kam pyntreikam noh ia ki jingdawa ki sengbhalang ban tehlakam ia ka jingwan rung ki briew nabar”.
U la byrngem ba lada ka sorkar ka pynshit, kan sakhi ia ki jingiakhih ba jur nangne shakhmat.”Ka jingiakhun kan long haduh ba ka sorkar kan pyntreikam ia ki jingdawa”, u la ong.
”Ngin leit pan jingshai haduh katno ki jingtreikam ka sorkar ki la iaid ban thaw ia ki lad ki lynti ban tehlakam ia ka jingwan rung ki briew nabar khamtam ki jaka mih bad ki jaka rung”, u la ong.
U la ong ba ka KSU ka dawa ruh ba ka sorkar ka dei ban pynlait ia ki trai shnong kane ka jylla na ka thapniang ka ain Residential Bill. Kane ka Bill kan treikam tang ia ki briew kiba nabar, u la ong.
Ha kajuh ka por, u la ong ba ka KSU kam lah ban pdiang ia ka Ordinance ka sorkar kaba thmu ban ai bor ia ki Rangbah Shnong.
U la ong ba ka KSU bad ki sengbhalang ki dawa ba ka sorkar ka dei ban pyntreikam noh ia ka Village Administration Bills ba la pdiang da ka KHADC bad ka JHADC.