Shah ktah bun ki longiing ha Umlyngkdait, na ka jingjia shlei um

Nongpoh: Ka jinghap slap kaba la neh kumba katto katne por ei ei mynta ka por shiteng sngi ha Nongpoh, ka la wanrah ia ka jingshlei um kaba jur eh ha shnong Umlyngkdait bad ha katei ka jingshlei um, ki la don shibun ki longiing kiba la shah ktah jur eh.

Nalor ka jingshah ktah ki iing briew, ka iiing Durbar hapoh katei ka shnong ka la shlei um bad nalor kata kawei ka jaka buh ia u khaw ban sam sha ki longiing jong lai tylli ki shnong, ka la shah tap ha ka um bad utei u khaw um long shuh.
Ki briew na katei ka shnong, ki la ong ba ka dawbah kaba la pynlong ia katei ka jingshlei um, ka dei namar ba rit palat ki nala pyniaid um, kumta ha ki por ba jur slap ka shait jia beit ka jingshlei um, hynrei kaba kham palat eh ka dei hynne ka sngi, namar la kham don shibun ki longiing kiba la shah ktah.