Ha ka kali kit tiar pynbthei, kit da ki briew, bat ki RBYF ia 10 ngut ki bar jylla

Nongpoh: Mynta ka sngi ha ka por 12 baje ei ei mynsngi, ki dkhot ka RBYF Umsning, ki la ioh ban bat haduh 10 ngut ki bar jylla, kiba la thmu leit ban trei sha ki Karkhana kiba don ha Umiam da kaba pyndonkam da kawei ka Mahindra Pick-up, kaba don ia u number AS-25-CC-4666, ka kali kaba la shna ha kata ka rukom bad kaba la iasyriem kum kito ki kali ba shait kit ia ki tiar pynbthei (Explosive Van) ne kali kit ia ki Biscuit.

Katkum ka jingiathuh da ki dkhot ka RBYF na Umsning, ki la iathuh ba la don ki dkhot na Nongpoh, kiba la pyntip sha ki ba ki ishankhmat ba katei ka kali ka lah ban kit briew hapoh kali, kumta haba katei ka kali ka la poi ha ki thain Umran, ki dkhot ka RBYF ki la pyrshang ban bat ia katei ka kali bad kiba la phah ruh ia u nongniah ba un plie ia ka jingkhang jong katei ka kali, khnang ba kin tip la katei ka kali, ka kit ia ki tiar jingdonkam ne ka kit ia ki briew, kiba thmu rung beain sha ka jylla.

U Samla Henry Marngar, uba dei u dkhot ka Umsning Circle ha ryngkat kiwei de, ki la ong ba ha ka por ba ki la phah plie ia katei ka jingkhang ba nadien ka kali, u nongniah jong katei ka kali, ha kaba nyngkong u la kyntiat ban plie, da kaba u ong ba hapoh katei ka kali, la thep ia ki tiar ba donkam eh jong ki Kompani, hynrei haba kitei ki dkhot ka RBYF, ki la phah plie jubor, la lap pynban ba hapoh katei ka kali, la shong da ki bar jylla suda, kiba la shong khnang ha katei ka kali, khnang ba kin lait ban na Infiltration Check Gate kaba don ha Byrnihat bad ka jaka Talasi ia kiba wan nabar kaba don ha Umling.

Hadien ba la lap ia kitei ki bar jylla kiba thmu rung beain sha ka jylla, ka RBYF lyngba ka jingialang u Bah Devansing Warjri, President ka Umsning Circle, ki la leit ban aiti noh sha ki Pulit ka Umsning Police Outpost, khnang ba ki pulit kin ioh ban leh katkum ki kyndon Ain. Ha kajuh ruh ka por utei u nongialam ka RBYF, u la ong ba hadien ba ka seng ka la lap ba ki bar jylla ki la sdang ban pyndonkam da kiba kum kitei ki kali, na ka liang ka Seng kan dang iai btah ia ki dkhot ba kin peitngor, khnang ba kino kino kiba thmu ban rung beain sha ka jylla kin ym iohlad.