Ther tyngeh u Bah Vincent Pala, ia ka seng UDP kaba la pyndonkam bakla ia ka tnad kam pohïing

Shillong: U Bah Vincent H Pala u ba dei u MP ka Lok Sabha na Shillong Parliamentary Constituency bad u ba dang shu shah thung shen kum u President bathymmai jong ka Meghalaya Pradesh Congress Commmittee(MPCC) u la ther tyngeh ia ka seng seng saiñ pyrthei kata ka United Democratic Party(UDP) ha kaba u la ong ba ka la pyndonkam bakla ia ka tnad kam pohïing namar ka jingjur shaba palat ka jingkhrong pisa beaiñ ha shilynter ka surok bah National Highway hapoh ka Jylla.

Haba kren sha ki katto katne ngut ki lad pathai khubor, u Bah Vincent H Pala u la ong ruh ba kan long ruh ka jinglehraiñ ia ka UDP namar ba kine ki kynrum ki kynram ki la ktah haduh katta katta ia ka shongsuk shongsaiñ ha ka jylla. Shuh shuh u la ong ruh ba haduh mynta um tip satia mano ba bat ia ka tnad kam pohïing ha ka jylla la u bat u Myntri Rangbah ka jylla, u Conrad K Sangma ne u dang bat hi u Bah Lahkmen Rymbui. U Bah Vincent H Pala u la pynrem ruh ia ka seng UDP da kaba u la ong ba ka seng UDP kam shym la don satia ka jingkitkhlieh ha ka wat hapdeng ki kynrum ki kynram kiba la mih ha kine ki sngi namar ba ha ka por ba don ki kynrum ki kynram bad ki jingeh ka UDP ka shu kwah tang ban lait na ki jingeh bad phet ialade da kaba pyndonkam bakla pat ia ka tnad pulit.

Ha kaba iadei bad ka jingleit khynra jong ki pulit ia ka ïingsah bad ka jingsiat iap ia u Bah Cheristerfield Thangkhiew ha ka 13 tarik u bnai Nialar 2021, u Bah Vincent H Pala u pynrem jur ia ka jingdkoh treikam jong ka Sorkar ha kaba iadei bad kane namar hashwa ba kan leit khynra ka dei ban da kylli bniah shwa shaphang jong u Bah Cheristerfield bad ban da tip bniah shwa namar ban shu leit kumto sha iing jong u kam iahap satia halor u dei u briew u bym don jingiadei shuh bad ka seng HNLC bad u ba don hapdeng ka jingpang jingshitom bad ban leit pyniap shisyndon ia u hakhmat ki khun kata ka bym iahap satia bad kane ka jingleh ym dei satia ban kynnoh ia ki pulit hynrei dei ban kynnoh beit ia ka Sorkar namar lada ym dei ba ai bor ka Sorkar ban siat ia u Bah Che ka mut ki pulit kin nym siat satia ia u.