Thang u lok ia ka ïing jong ka lok, haduh ban da kylla dpei lut, ha ka shnong Kseh

Shillong: Ha kawei ka jingjia pluh ïing kaba la jia ha ka step jong ka sngi Saitjaiñ, kata ka 28 tarik u bnai Nailar 2021 ha ka por 5 baje eiei kawei ka ïing kaba don ha ka shnong Kseh kaba hap hapoh ka Elaka Sumer jong ka East Jaiñtia Hills District bad kaba la dei trai da ka Kong Juniakai, ka la shah thang bad shah bam khait lut ha ki thylliej ding tad haduh ban da kylla dpei lut ki jingdon jingem baroh kiba don hapoh katei ka ïing. Katkum ka jingsuba jong ka Kong Juniakai ka la suba ba ia katei ka jingjia la donkti da u lok jong ka ban thang duh ia katei ka ïing jong ka. Utei u lok jong ka u dei u ba la tip kyrteng kum u Well Pasleiñ bad ha katei ka jingjia ym shym la don kano kano ka jingjia kaba sngewsih. Katkum ki khubor ba la ioh lum la iathuh ba u Bah Well Pasleiñ u dei u briew u ba dang shu mih shen na phatok dang ha kine ki sngi ba la dep.

Na ka liang jong ka East Jaiñtia National Council Sumer Circle lyngba u President, u Sikilan Chyrmang ki la dawa ia ki bor jong ka aiñ ba ka dei ban kem bad ban pynshitom tyngeh katkum ki kyndon aiñ ia utei u briew u ba la suba donkti halor katei ka jingjia.

Na ka liang jong ka shnong ba kynthup ruh naduh u Waheh Shnong u Bah Starship Pasleiñ, u Bah Kner Dkhar u ba dei u Secretary Shnong bad ka Chairman Seiñmanbei Kong Delight Dkhar ki la pynrem jur ia ka jingleh jong u Bah Well Pasleiñ u ba la thang duh ia ka ïing jong ka lok jong u hi