“Sharai bha ia ki blang, ioh bam ki suri” ong u bah HDR

Shillong, 15 Jymmang:
Ha ka por ba ka Chairperson ka KHADC ka kong Teilinia Thang khiew ka la ailad ia baroh ki MDC ban kren khublei ia u CEM ba thymmai ka KHADC u bah Pyn shngain N Syiem, baroh ki MDC ki la kren ha katei ka dorbar.
Napdeng baroh ki nongkren uwei na ki dkhot ka Liang synshar ba thym mai ha KHADC u bah HDR Lyngdoh u la kren siat ia ka ARPA namarba ka jingkylla tdong tdong khlieh khlieh ki dkhot jong ka ha kaba u la ong ba baroh ka dei namar ka jingbym lah u nongsharai ban sumar bad ban ri kyndong ia ki blang jong u.
U bah HDR u la kyntu ia u bah Syiem ba u sharai bha ia ki blang jong u namarba tang shu bakla wiak ki suri kin sa ioh ban bam ia ki, “Sharai bha ia ki blang jong phi ruh, ioh kin shah bam ha ki suri” ong u bah HDR Lyngdoh. U la ong ba lada jia ba u bah Syiem u lah ban sharai bha ia ki blang jong u khlem pep kiwei pat ki nongsharai blang kin ong ‘shim bah pynshngain pynsharai lang phi ki jong ngi’ u la ong biang.
Utei u MDC ka Sohiong u la kren siat ruh ia ka jingioh CEM ka KHADC haduh laingut ha ka shisnem ha kaba u la ong “Lym da pat kynih haduh laisien ka bneng kan ym shai” kaba u la thew ba haba u syiar u kynih laisien ka bneng kan sa shai, kaba u la siat ba u bah Pynshngain u dei u CEM b alai ha ka shisnem bad u kyrmen ba hapoh ka jingialam jong u baroh ki kam ka District council kin iaid beit iaid ryntih.
Tang mar ia shong u bah HDR Lyngdoh, joit la ieng sa u bah Ardent M Basaiawmoit ban shim ia ka pali jong u ban kren, haba kren ha katei ka ing dorbar u bah Ardent u la ong ba mynta u la sngewthuh ba u MDC ka Sohiong uba don ha kynhun PDF u la phla shai ba dei pleng ki suri kiba la ioh ban bam ia ki blang, “Nga nangmut ba ngi ia don tang para nongsharai, hynrei don pleng ki suri”.
“Hynrei ngi pat hangne ngi ioh da ki suri kiba runar kiba prong , haduh ba ngim lah shisha ban sharai ia ki langbrot” ong biang u bah Ardent . Katkum ka ingkren u bah Ardent la sngewthuh ba ka jingkren jong u ka thew ba ki suri kiba runar bad kiba prong ki dei na ka liang ka PDF kaba ialam da ka seng Congress.
Haba kitbok kitrwiang ia u CEM ba thymmai u bah Ardent u la ong ruh ba ka ARPA kan ym lah ban kular ban ai ka jingiatreilang namarba dang hap ban ia peit shuwa ia ki kam jong u. “Wat ym bud ia ki polisi u bah Ardent ne ki polisi u bah Adelbert ioh ka shuki jong phi ruh ka hap tang shipor kum ki , trei ki polisi lajong” kyntu u bah Ardent ia u CEM ba thymmai ka KHADC.