Plie biang ka KSU, ia ka SBI Mynso branch ha Phramer

Shillong: Ki 4 ngut ki dkhot jong ka SBI ki la wan iakynduh ia ka KSU Jowai Circle, halor ka jingkhang ia ka SBI Mynso Branch ha Phramer.

Ha kane ka jingiakren, na ka liang u Major Henry uba dei u Security Manager jong ka SBI, Meghalaya u la kular ban pynbiang katba lah na bynta ka jingdawa jong ki paitbah ha ka shnong Phramer. U la iathuh ruh ba na ka liang jong ka SBI, ki la wan pyndait ia ka machine ban print passbook bad ki la buh ruh kawei ha counter lada jia kumno kumno ba katei ka machine ka kum sniew bad ki la kular ruh ban buh biang sa kawei ka machine ha counter lada jia ba dang dawa ka Bank, kumjuh ruh na bynta ki nongtrei, namar ha katei ka bank ka don tang uwei u nongtrei.

Na bynta ka ATM, Ki la ong ba ka dei ka kam kaba shim por namar ki machine ki wan na bar ri.

Ha ka jingleit pynshisha jong ka KSU, ka la lap ba la dep shisha ban buh ia ka passbook machine bad la pyntikna ba ki treikam, ha kaba la sakhi da u Branch manager ha kaba u la pyni ba ka la long shisha ka Machine.

Ha kane ka jingleit ban peit la synran lem bad u Rangbah Shnong jong ka Phramer bad ki dkhot jong ka KSU jowai Circle kiba kynthup ia u President, Mr.Ioannis Suchiang, Gen.secretary, Phraki Thubru, VC president Jowai Circle Ewanmi Phawa bad ki dkhot jong ka Jowai Circle.