19 tarik khot pakhang shnong ki Rangbah Shnong Ri-Bhoi rBan pyrshah ia ka Ordinance

Nongpoh, 13 Jymmang:
Ka Dorbar ki Rangbah Shnong Ri Bhoi District (DKRSRBD) ki Ri-Bhoi ki la pynbna da ka pakhang shnong ba 12 kynta ha ka 19 tarik mynta u bnai ban pynpaw pyr shah ia ka jingwanrah ka sorkar jylla da ka Ordinance ha jaka ban pdiang noh ia ka Village Administrative Bill  ka KHADC.
Ia kane ka rai ban khot pakhang shnong la shim ha ka jingialang jong ka DKRSRBD kaba long hynne ka sngi ha madan Umbuda, Nongpoh. Ka pakhang shnong kan long naduh ka por 6 baje myn step haduh 6 baje janmiet.
U secretary ka DKR SRBD, Bah Cleophas B Syiem ha ka jingiadonlang ruh u Chairman ka DKRSRBD Bah Rocky Kylla, ka Doabr Ki Rangbah Shnong ka la shim ia kane ka rai hadien ba ka sorkar haduh kane ka khyllipmat kam shym la shim khia ban pdiang noh ia ka VAB ka KHADC hynrei ka la pynmih pynban da ka Ordinance kaban pynkupbor shipor ia ki Rangbah Shnong.
Ka jingbymler ka sorkar jylla ba la lamkhmat da ka MUA-II bad ka jingbymlah jong ka KHADC ban shim ia ki lad ki lynti ban pyntreikam ban pynkup bor ia ki nongsynshar shnong, ka la pynlong ia ka DKRSRBD ban pynlong syndon da ka pakhang shnong ba 12 kynta.
Ka DKRSRBD ka la iawer ia ki paidbah ka district, ki sengbhalang, ki nongtreikam sorkar, ki nongtreikam lajong bad kiwei kiwei ki riewshimet kynthup naduh ki samla kynthuplang naduh jong ka Ri Khasi Jaintian ban kin ia shimbyntalang ha kaban kyrshan ia kane ka jingiakhih jong ka Dorbar ki Rangbah Shnong na Ri Bhoi District.
Ha ka jingialang mynta ka sngi, la wan lang u Ma Erwin Sutnga, Legal Adviser ka DKRSRBD, Bah Robert Kharjahrin, Secretary ka HYC, Sengkmie, Bah FM Mawphniang, lem bad kiwei kiwei ki nongialam sengbhalang, ki Rangbah Shnong jong ki shnong bapher bapher ka Ri Bhoi District.
Shwa ban poi ka sngi pakhang shnong, ka DKRSRBD kan pynlong ia ka jingialang paidbah ha Bhoirymbong ban pynsngewthuh paidbah halor ka jingkhot pakhang shnong.
Ka Hynniewtrep Youth Council (HYC) North Khasi Hills District bad ka Hynniewtrep People Federation, Ri Bhoi District ka la kyrshan ia ka jingiakhih ka Dorbar ki Rangbah Shnong Ri Bhoi District.
U Bah Syiem u la ong ba ha ka jingshisha ka DKRSRBD, ka la dep ban ai por arsien ia ka sorkar jylla bad ruh ia ka KHADC ban pyntreikam ne pynlong ain noh ia ka Village Administration bill, hynrei shi bnai wat ruh, ka sorkar kam shym la lah ban leh eiei bad ka pynmih pynban da ka Ordinance, kaban long ka jingmushlia jong ka sorkar jylla ia ka KHADC bad ruh ka jingbymlah pat jong ka KHADC ruh ban pyntreikam ia la ka bor kumba la pynkupbor da ka Constitution jong ka Ri India.