Bym jubab ka sorkar, yn bteng ka pakhang ophis:HSPDP

Shillong, 13 Jymmang:
Ka HSPDP ka la pynbna ba ka pakhang ophis kan bteng lashai ka sngi namar ba kim pat ioh kano kano ka jubab na ka sorkar halor ka jingdawa jongki. ”Ngi la rai ban bteng ia ka jingkhot pa khang ophis la sngi Palei”, la ong u vice president ka HSPDP u Bah Ardent Miller Basaiawmoit ha kane ka sngi Balang.
Katkum ka jingong jong u Bah Basaiawmoit, ka HSPDP kam pat ioh kano kano ka jubab na ka sorkar halor ki jingdawa jongka.
U la iathuh ba ka party ka la rai ban pynlong ia ka jingialang paidbah ha baroh ki district ka  Khasi bad  Jaintia Hills  ban pynsngewthuh ia ki paidbah shaphang ka jingdonkam ban pynkup bor ia ki Rangbah Shnong hadien ba la shah sloit ha ka kashari High Court ka Meghalaya.
U la ong ba ka jingrai ka Kashari ka long kum ka jingpynkhie thiah ia ki bor synshar shnong. “Ka lynti ban weng ia kane ka jingeh ka long ban don ka ain ban pynkup bor ia ki rangbah shnong”, la ong u Bah Basaiawmoit. U la iaroh ia ka jingkyrshan jong ki paidbah ia ka pakhang ophis ha ka sngi sdang hynne ka sngi. ”Ngi kyntu ia ki paidbah ban bteng ia ka jingkyrshan ia ka jingiakhih jong ka”, la ong u vice president ka HSPDP.