Ka SBI, ka leh aiu?

Ka KSU Jowai, ka la pyni, da ka bor ia ka State Bank of India, ha Phramer, halor ka jing bym lerkam jong katei ka Bank, kaba don ha katei ka jaka.

Kaba lyngngoh, ka long, ba ym ju don ba iakren satia hangne, ha ka jylla jongngi, ia ka bynta jong ki Bank, ha ka jing shakri paidbah bad la shu ailad, ba kin leh katba ki sngew bit ne ki sngew mon, naduh ka ai ram, haduh ka shim sut, haduh ka rukom thep pisa, haduh ka phah ieng lain dusmon ia ki paidbah, da ki bun kynta, haduh ka beh ram, nangta sa ka jing ai ram jongki sha ki samla trai shnong kiba donkam.

Bun phew snem mynshwa, ka la don bha ka jing iakren halor kane ka mat, ha kaba ka sorkar jylla, ka shim khia ban tih tyllong ia kata, kaba ki ong credit and deposit ratio, mynta pat, ym don uwei ruh U MLA/MDC/MP uba ju kynmaw ban iakren ia kane ka phang bad la shu tylliat jem ki Bank, ia ki paidbah, ha kaba lada buh pisa ruh ym long, lada sei pisa ruh ym lah, lada leit sha atm, ban sei ia ka pisa lajong ruh, shah ot khajna pynban.

Ka la dei ia ki riew shemphang, ba kin tih tyllong noh ia kane ka mat ban ia tip, la ka State Bank of India, kaba dei ka Bank, kaba heh tam, ka jing ioh nong ha India; ka don hangne, ban shu leh kum ki kharkaia, lane ioh ka don hangne ban iarap ia ki trai shnong ka jylla bad lada ka long kumta, ka dei ban sei noh wut wut, ia ki jingshisha, ba katno ka la theh tyngka, ban ai ram ia ki trai shnong ka jylla, ha ka thaw iing thaw sem, ha ka trei kam lajong bad nangta katno ka ioh lum ia ka pisa pat, na ki jingthep pisa jong ki trai shnong.

Halor ka jingdkoh jong ki Bank, ha ka jylla, lei; ka long ka bym long shuh ban iakren, namar ba kam dei tang ha Phramer, hynrei ka dei ha ka jylla hi baroh kawei bad kiba kham trei kam, ki dei tang ha syndah ka Secreteriat, hynrei lait nangta, ki dei ki Bank, kiba phlop suda, ha kaba ka jing shim kabu ia ki paidbah, kaba la i sohsat shi katdei ba na ka bynta ka pisa lajong, hap leit ap kai, da ki bun kynta ha jingkhang bad katei ka dei ka kam pohjait, kaba la jubor than.
Ka la dei ban don ka kynhun ki riew shemphang, kiba tih tyllong noh nangne shakhmat, ia ka jing trei kam ki Bank ha ka jylla, namar ba kine ki wan khnang sha ka jylla, ban kamai na ka pisa jong ka sorkar, ym ban iarap paidbah.