Jingialang AMSSASTA WKH

Nongstoin,
13 Jymmang:
Ka All Meghalaya SSA School Teachers Association West Khasi Hills kala khot pynlong ia ka jingialang ban iatai halor ki jingdonkam kiba bun na ka bynta ki skul bad ki nonghikai SSA kiba don ha baroh ka thain WKH, ia katei ka jingialang la pynlong mynha ka sngi ba ar jong ka taiew ha sor Nongstoin. La pyniaid ia katei ka jingialang da u bah O. Sangriang Vice President jong katei ka seng ha ryngkat ka jingiadonlang jong ki nonghikai skul SSA na ki skul bapher bapher kiba don hapoh jong ka District.
Na ka liang jong ki nongialam jong katei ka seng kila pynpaw ia ki jingdawa na ka Sorkar lyngba ka SSA ha kaba iadei bad ka rukom siew ia ki tulop sha ki nonghikai bad kumjuh ruh ia ki nongshet ja ba ki dei ban siew noh manla u bnai ia ka tulop jong ki bad ban pynrung ruh shi syndon sha ki jaka kynshew pisa jong ki ha Bank (Bank Account).
Shuh shuh ka seng kala dawa ruh ba kin ai ia baroh ki kot skul katkum ka Syllabus ha ryngkat ki kopi ha shwa ban plie skul, namar ba mynta ki skul kim ju ioh tikna ia ki kot ha ka por kaba biang bad kim ju ioh shuh ruh ia ki kopi kumba ki ju ioh ha ki por mynshwa. Ka seng ka la buh ruh ka jingkyrpad ia ka Sorkar lyngba ka SSA ba kan peit bad shimkhia lem halor kitei ki jingeh ba ki nonghikai skul SSA ki iakynduh na ka por sha ka por bad kumjuh ruh ban pynioh ia baroh ki jait kot pule kiba donkam bad lada long kaba lah ban pynioh biang ia ki kopi skul.