Pyrkhat ki seng, sa kiwei ki jingiakhih

Shillong, 13 Jymmang:
Hadien ba ka jingiakhih da kaba shong kyllain myngngor hajan ka Addittional Secretariat kam shym la seisoh eiei naba ka sorkar kam shym la sngap ba kam shym la jubab hi ruh ia ka jing dawa ki 13 tylli ki seng bhalang, ki nongialam jng kitei ki 13 seng ki la ong ba kin hap ban ia shong pyrkhat biang bad shen kin sa pynbna ia kiwei pat ki prokram iakhih jong ki. Haba kren sha ki nongthohkhubor, u President ka FKJGP u bah Joe Marwein u la ong ba haduh mynta kim shym la ioh jubab na ka sorkar ha kane ka jingiakhih ba nyngkong jong ki hadien ka jingshah kem u president ka KSU u samla Daniel Khyriem bad u la ong ruh ba ha kine ki sngi ki nongialam sengbhalang kin hap ban da ia shong pyrkhat shuwa ban pynbna sa ia kiwei pat ki prokram iakhih.
Ki nongialam sengbhalang ba kynthup ia u General Secretary ka KSU u samla Auguster Jyrwa, u President ka GSU u Tengsak Momin, President ka AYWO u Edinson Momin, President ka AJYWO u bah M.H Dkhar, General Secretary ka HNYF bah Sadon Blah ki la dawa ba ka sorkar ka dei ba pyllait noh ia u president ka KSU u samla Daniel Khyriem khlem ka jingteh kyndon bad kumjuh ruh ban weng noh ia baroh ki mukotduma pyrshah ia ki nongialam sengbhalang kiba la shah ujor ha ka por ka jingiakhih ILP.
Shuh shuh ki nongialam sengbhalang ki la dawa ba ka sorkar ka dei ban pynsted noh ban pyntreikam ia ki ain kiba ki la dei ia kren bad ka sorkar ha ki sngi kiba la dep. Kumba ka long mynta ki la iathuh ba ha kaba iadei bad ka jaka rung ka mih ki bar jylla ka kam ka la jan poi sha kaba kut kaba ki la de ban ia kren ba ka komit kaba dei peit, hynrei kaba sah mynta mynta ka dei sa tang ka Residential bill bad ka Benami Act.
Lah ban kdew ba ha katei ka jingiakhih shong kyllain mongor kaba la ne kumba 7 kynta ki la don kumba 300 haduh 400 ngut ki dkhot sengbhalang kiba la wan ban ia shim bynta , katei ka jingshong kyllain mongor ka la sdang naduh ka por 10 baje mynstep haduh 4 baje janmiet.
Hadien ba la wai , ki dkhot sengbhalang ki la iaid da ka kjat na IGP ter ter shaduh Motphran, hynrei ha shuwa ba kin iaid lyngba katei ka lynt ka la don ka jingpyni bor kaba shipor bad ki pulit naba la khanglad ia ki ban iaid lyngba katei ka lynti hynrei la phah ba kin iaid na AG markhap nan polok ter ter. Hynrei ki dkhot sengbhalang kim shym la sngap ia ki pulit bad ki la thom beit ban tur na IGP khmat ophis SP , Khyndailad ter ter sa Motphran bad la bud pahara ia ki da ki pulit.