Tieng ki nongniah kali ba shah kem u President ka KSU rBa ioh huri hura ka nongbah Shillong

Shillong, 12 Jymmang:
Ka jingshah kem u President ka KSU u bah Daniel Khyriem, ka la pynkhynniuh ia baroh khamtam ia ki nongniah kali namar ba ki lah ban duh kamai lada don ki jingiakhih lada don ka huri hura bad kane kan pyniap ja ia ka iing ka sem, la ong u General Secretary ka seng ki nongniah kali ka East Khasi Hills Local Taxi Drivers Welfare Association (EKHL TWA) u bah Wandonbok Jyrwa haba kren mynta ka sngi sha ki lad pathai khubor.
U la ong ba ka jing shah kem u President ka KSU kadei ka jingujor kaba la mudui na ophis u DC  bad u la kyntahh ba lada ka sorkar ka ujor ba kadei ka jingjulor hapoh ka jingiakhih ka ILP kadei ban kem ruh ia baroh ki ophisar kiba klumn jaka tuh ha New Shillong.
 Ka seng ka la dawa ba u DC ba la kumno kumno u dei ban weng noh ia ka jingujor pyrshah ia ka KSU khnang ba ki paidbah kin ioh biang sa shisien ia ka jingshaniah bad ka jingkmen.
Ka jingiakhih ILP ka dei katkum ka riti synshar paidbah bad kam dei ka jingiakhih ba long beain, la ong u Bah Jyrwa.
Ka seng ka pyrshah ia ka jingkem ki bor ba halor ia ki nongialam ka KSU halor ka jinglut jingsep ba la ujor da ki riew shimet bad ka sorkar.
Pynshit paidbah ha ka ralli ka sma politik, ong u Bah Rani
Ka jingialang paidbah jong ka HSPDP ha kine ki sngi, ka long tang ban shu pynshongshit paidbah bad ka la sma politik, la ong u nongai jingmut ka seng  East Khasi Hills Local Taxi Drivers Welfare Association (EKHLTWA) u Bah Disparsingh Rani.
Katkum ka jingong  une u nongai jingmut ka EKHLTWA, la ong ba kane kadei tang ka jingpynshit paidbah namar lada ki sngewkhia shisha naduh mynsiem, ki ladei ban lum shwa da ka jingialang ba jar jar jong ka seng sain pyrthei baroh khoit.
Kane ka jingpynlong pakhang ophis ym tang ba ka ktah ia ka sorkar hynrei ka ktah ia ka ioh ka kot ki nongniah kali namar lada don pakhang ophis ki nongniah kali kin mih kamai na ka bynta jongno, la ong u bah Rani haba kren sha ki nongthoh khubor hynne ka sngi Hatmajai.   
Ha  kawei ka liang u la ong ba ka jingialam bakla jong ki khynhun seng sain Hima dei pynban ka jinglehrain ha khmat ka ri India bad namar kata ka donkam kyrkieh ba ka District Council kan ujor pyrshah ia ka rai jong ka High Court ba kan pynsahngeh noh ia ka hukum ban sloit ia ka iktiar jong ki Rangbah shnong.