Pan jingshai ka HSPDP na ka kong Wansuk

Shillong, 12 Jymmang:
Ka HSPDP Pynur sla Constituency Area ka la pynlong ia ka jingialang ha ka 9 tarik u jymmang ban ia syllok halor ka Land Boundary Agreement (India & Bangladesh) ia kaba ka Sorkar India ba la ialam da ka BJPka la mynjur bad pyn skhem ia kane ka Bill ha kine ki khyndiat sngi.Ka HSPDP ka la ong ba ka Dulir ka kynthup ia katto katne ki Jylla bad kumjuh ruh ia ka Jylla Meghalaya ha kaba ki shnong kiba don khappud bad ka Bangladesh kiba hap ha ka thain Riwar Mihngi (Pynursla)kum ka Pyrdiwah,Lyngkhat (I,II,III)Kumjuh ruh Dawki,Tamabil bad kiwei kiwei ki dei ki jaka ba la kdew ha ka Dulir Khyndew (India & Bangladesh).
Ka jingiakynduh ki Nongkitkam ka HSPDP ia ki katto katne ngut ki paidbah nongshong shnong basah ha kitei ki jaka khappud ki la pynpaw ia ka jingsyier mynsiem ia katei ka Dulir ka long ne em ka jingmyntoi ne kan long pynban ka jingduhnong ka jong ki ia ki khyndew ki bri ba kan hap noh sha u pud u sam ka Bangladesh. Kumba ka paw ja ki khubor ba ka MP sha ka Rajya sabha, ka Kong Wansuk Syiem ka la pynpaw ba kane ka Bill kan wanrah shibun ki jingiohnong ia ka Jylla Meghalaya. Ka HSPDP Pynursla Constituency Area ka ka pan jingshai na ka kong Wansuk Syiem ban pynshai ha khmat ki trai khyndew trai bri bad khamtam eh sha ki paidbah jong ki shnong bad ki thain ba shong basah ha ki khappud bad ka Bangladesh khnang ban pyni bad kdew ia u pud u sam bad ki jaka puta ba hap sha ka Jylla Meghalaya bad kumjuh ruh ban pynshai kaei ka jingmyntoi ba ki paidbah ki lah ban ioh lyngba kane ka Agreement. Khatduh eh ka HSPDP Pynursla Constituency Area ka pynpaw ba kam lah ban pdiang ia ka jingpyntrei kam ia kane ka jingpynbeit pud bad ka Bangladesh khlem da don bad ioh ka jingiakynduh bad jingmynjur na ki Nongsynshar shnong,raid bad ruh na ki trai jaka trai bri.