Kren pyrshah sorkar U bah Hek, ba u sngewsih ba shah weng myntri, ong U Conrad

Shillong:U Conrad K Sangma u ba dei u Myntri Rangbah jong ka Jylla, u la ong ba ka jingkren jong u Bah AL Hek u ba dei u myntri barim, ka tnad ka koit ka khiah ha ka jylla pyrshah ia ka Sorkar ha kaba iadei bad ka jingshah siat iap jong u General Secretary barim ka Hynniewtrep National Liberation Council(HNLC), u Bah Cherishsterfield Thangkhiew kaba la jia ha ka 13 tarik u bnai Nailar 2021, ka dei tang namar ka jingsngewsih palat ka jong ba u lah shah weng na ka shuki kaba u bat kum u Myntri jong ka tnad ka koit ka khiah ha ka jylla.

Shuh shuh u Conrad K Sangma, u la kyntu ia u Bah AL Hek ban kiar na kino kino ki jingkynthoh, ki bym iahap bad u la kyntu ruh ba u dei ban shimkhia ia ki kam kiba la bynshet ha u kum u nongaibuit jong u Myntri Rangbah. U Conrad K Sangma u la ong ruh ba ka jingweng noh ia u Bah AL Hek na ka shuki kum u Myntri ka tnad ka koit ka khiah ka dei hi ka jingkwah jong ka seng Bharatiya Janata Party(BJP), kaba la pynpaw ruh ba ka la don lypa ka jingiakut hapoh ka seng ban ai shuki sa ia u Bah Sanbor Shullai. U Conrad K Sangma u la kyntu ruh ia u Bah AL Hek ba un leh kum u rangbah bad u la ong ba ka jingleh jong u Bah AL Hek kam iahap satia bad lada ki don kiei kiei ki jingbym ia sngewthuh jingmut ki dei ban iakren hi hapoh ka seng jong ki bad kaei kaei pat kaba u Bah AL Hek u kren ne leh kam dei pat ban ktah ia ka Sorkar.