Ka la dei ia ka Congress, ba kan phai dien ialade

Ka sain pyrthei ha ka jylla Meghalaya, ka la jyrsih palat liam, namar ba ka kyrdan jong U Akhil Gogoi, (uba jop elekshon, khlem pynlut shi naia ruh), kam don shuh satia ha ki 60ngut ki MLA jong ka jylla, hynrei ki la don, tang ki heh pla suda.

Nalor kitei ki mat kyllum, ngi hap ban iakren hangne, halor ki jing kynthoh U Mukul Sangma, ha kaba ula ther ia kane ka sorkar MDA, halor ki jinglong jingman ha ka jylla; hynrei halor kane ka mat, ka long kaba shongnia, ba ka liang pyrshah, kan sangah ia ka sorkar, katba ha kajuh ka por, ka seng Congress, ka dei ban kynmaw ialade, la ka la leh aiu, ha ki 40snem tam ne duna, ba ka la synshar ia ka jylla, kaba la dap artad 50 snem ka rta.

Kane ka jylla, kam shym la dawa ILP, tang mynta, hynrei, ka dei ka mat kaba la slem, hynrei kam pat ju ioh; kane ka jylla, ka la dawa ban pyllait ia ka jingtih dewiong, naduh u snem 2014, hynrei, ka sahteng haduh mynta, kane ka jylla, ka la kren pyrshah, ia ki karkhana dewbilat, hynrei, ki dei kiba la plie ha ka por jong ka sorkar Congress, kane ka jylla, ka la dawa ia u pud u sam, hynrei, ngim lah ban leh eiei haduh mynta.

Halor ki kam pyntriem bapher, ngi kynmaw ia ka jingbeh thong ki pulit ia ki nongialam seng bhalang, ha ki snem 2012- 2013, namar ba ki dawa ia ka ain inner line permit (ilp) bad nangta ba U Mukul Sangma, u thaw ia ka ain MRSSA bad nangta ngi kynmaw ia ki jing iap briew ki bym kai ha Mookhep, ba ki pulit ki siat iap ia kiba iakhih pyrshah, halor ka jing khang dewiong, ka jingiap briew ha Langpih, ba ki pulit Meghalaya, kim leit pahara ia la ki briew lajong, sa uwei u nongniah Max, u shah tian bishar, ba u kum pynwit ia ka kali, kaba ialam ia U Mukul Sangma ha 3mer bad sa shibun kiwei pat ki jyrsieh, kiba ka NPP, ka ioh tied jem ia ka seng Congress bad pynhap syndon jrain, ha ka elekshon 2018.
Na bynta ka jing myntoi jong uba bun, kan jin da la bha eh, lada ka sorkar NPP, kan sei noh ia ka kaiphod jong ka jingshah siat iap U Fullmoon Dhar; sa u pulit uba shah siat ha Patharkhmah, ka jing shah siat ha Langpih, ka jing shah siat ha Mookhep, ka jingshah kem u nongniah Max bad wat ka jing shah iap, ki 9ngut ha Tura bad Williamnagar ha u 2005; khnang ba ki paidbah, kin ia shai kdar.