Weng kam shwa shipor ia U DGP bad ki heh pulit ba iadon bynta ban ialam ha ka jing shah pyniap u Bah Cherishterfield, ong ka KSU

Shillong: Ka jingjia ha ka step phyrngap jong ka 13 tarik Nailar 2021,ka la pynkyndit bad sah um dum ia kiba bun balang, namar ia u briew uba la wan phai sha ka Jingim kaba thymmai ha ka Im lang ka sah lang la shu shim bad dkhat jubor da kaba shu siat iap ka long ka bym lah pdiang, namar lada don kano kano ka jingsuba la dei ban shu kem kat kum ka lynti jong ka aiñ.

Kumta halor kane ka mat kaba la pynsah umdum ia ka Khasi Students’ Union(KSU) ka la kren shai kdar ba ïa ka kynhun tohkit (judicial inquiry)ba la thung da ka Sorkar ka dei ban long ka jingtohkit kaba laitluid, ka dei ban long kaba shai kaba lah ban wanrah ia ka kaiphot kaba pynhun bad pdiang da ki ba ha iing hasem, ki riew paidbah kumba ka jing khmih lynti bad angnud bad ym kwah ba ka jingtohkit kan shu jah lynti bad kan shu sah umdum.

Halor kane ka bynta ka seng ka kyntu jur bad dawa iaka sorkar ba ka dei ban pynsangeh trei kam shipor (suspension) ia kito ki pulit kiba ialam iaka kynhun ban siat iap ïa u GS barim ka HNLC bah Cheristerfield Thangkhiew bad wat ia u DGP ruh dei ban bujli noh,katba dang iaid ka jingtohkit, khnang ba ka jingtohkit kan long kaba khuid kaba suba ban nym don kano kano ka jingkah lynti hangne hangtai bad lada ka sorkar kam pat lah ban ai suspension shwa ia kito ki Pulit kiba don bynta ha khmat ban ialam ha katei ka step, kan long ka bym don jingmut haei haei ruh ban iohi ia kata ka jingtohkit kaba biang tara, namar ba ka seng kam kwah ba ka jingtohkit kan kyllaiñ bad dam lynti,hynrei ka seng ka kwah ba kan long kaba shai kaba khuid bad kaba laitluid khlem da don ka jingteh ne mushlia da mano mano ruh .

“Ka jingangnud jong ka seng ka long kum kine ki jingjia kim dei shuh ban dang jia nangne sha khmat, namar ioh lehse ka don ka jingsuba iano iano yn shu jubab da kaba shu siat iap bad ka dei ka lynti kaba yn nym lah ban pdiang ha kane ka Ri Synshar Paidbah. Ka seng kan don ha syndah bad kiba ha iing ha sem ha baroh ki liang khnang ban ioh iaka jingbishar kaba hok kumba la khmih lynti” pynkut ka kyrwoh na U Bah Lambokstarwell Marngar, President KSU.