Siat ki runar ia U BDO

Shillong,  11 Jymmang: 
U Block development officer (BDO) ka West Garo Hills hynnin ka Lah sngi u Blei, u la siat ha ki kynhun runar katba u dang  iaid lynti na kawei ka shnong  kaba don hajan Jengjal kaba jngai kumba 40 km na Tura.
Kane ka jingjia ka la jia ha Upper Dolonggre kaba dei ka national highway-51 kaba don hapdeng Jengjal bad Rongram ha ka por 11 baje janmiet.
Une u BDO ba shah siat la tip kyrteng kum u Laben Ch. Marak uba dei u BDO ka shnong Dadenggre sub-division ha West Garo hills, u la shah siat katba u dang iaid lynti da ka kali bad u nongniah jong u.
 ”U BDO u dang leit ha kawei ka shnong ryngkat bad u nongniah kali jong u, katba u dang sahngeh  ha kawei ka shnong  ha Upper Dolonggre, ki kynhun runar ki bym shym la lah ban ithuh ki la wan ban siat bad mar mar ki la phet. Hadien kane ka jingjia, u la leit ban ujor ha Rongram police station bad la rah ia u ha Civil hospital Tura na bynta ban ai ka jingsumar”,la  ong u SP ka West Garo hills Mukesh Singh.
La iathuh ba na ka liang ki pulit ki dang pynlong ia ka jingtohkit halor kane ka jingjia.