Kwah ka PDF ban bat ka KHADC, ia ki RS

Shillong, 10 Jymmang:
Ha ka sngi saitjain jong ka taiew ka People Democratic Forum ka la khot jingialang ia baroh ki Khlieh nongsynshar ha kane ka jylla ban ia phylliew jingmut halor ka jingshah sloit bor ki Rangbah Shnong bad ha katei ka jingialang ki la shim ia ka rai ban thoh sh aka Executive Committee ka Khasi Hills Autonomous District Council ( KHADC) ba kan pynmih da ka jingpynbna ba kat bym lah ban pynbeit ia ka kam Rangbah Shnong ka ban ithuh da ka ain, ka District Council ka dei ban bat ia ka bor jong ki Khlieh Nongsynshar halade hi ha kaba ka dei ma ka ka ban ai sertiphiket, ne NOC ia ki paidbah ba donkam haduh ban da lah ban pynbeit ia ka kam ki Rangbah Shnong.
Ha katei ka jingialang kaba la wan ban ia shim bynta da ki spah ngut ki Khlieh Nongsynshar ha Community Hall ha Jaiaw Shyiap, Lumpyllon ka PDF ka la rai ban ia treilang bad ka ARPA na ka bynta ban ia khun ia katei ka kam ba iadei bad ki Rangbah Shnong, ha kaba ka la ong ba ki nongialam ka PDF bad ARPA shen kin sa ia kynduh lang baroh 30 ngut bad kin sa ia phylliew jingmut hadien kin sa khot ia ka Dorbar bah jong baroh ki Hima bad Elaka.
U bah Pynshngain N syiem Chairman ka PDF u la iathuh ba katei ka jingialang ka la rai ruh ban ai ka jingkyrshan ia ka Village Administration Bill ba ka KHADC ka la thaw bad ka la kyntu ia ka sorkar ba ka dei ban mynjur noh ia katei ka Bill bad ban phah sha u Lat ban pynlong ain noh ia ka.