Pynjlan ia ka korphiw haduh ka 5 baje mynstep jong ka 18 tarik, yn dang bteng ka jingkhang ia ki internet

Shillong: Hadien ba la mih ki jingklumar ha ki katto katne ki bynta jong ka nongbah Shillong, na ka liang jong ka Deputy Commissioner ka la pynjari noh da ka korphiw kaba la sdang naduh ka 8 baje mynmiet jong ka 15 tarik u Nailar 2021 bad kaba dei ban kut haduh ka 5 baje mynstep jong ka 17 tarik u Nailar 2021, hynrei mynta ka sngi na ka liang jong ka ophis ka DC ka la rai ban nang pynjlan biang ia ka korphiw sa kumba 24 kynta kata ka ban kut haduh ka 18 tarik u bnai Nailar 2021 ha ka por 5 baje mynstep. Ia ki internet data jong ki mobile ruh yn dang iai bteng ban khang.

Ha kitei ki kynta ba don ka korphiw la shah ban iaid tang ia ki nongtrei Municipal, ki nongtrei MEECL bad la shah ban plie tang ia ki dukan pharmacy ne ki dukan die dawai.